भांगरभूंय | प्रतिनिधी
पणजी : पोरूंचे तुळेंत अंदूं उजो पालोवपी दळान तिपेटी परस अदीक लोकांचे जीव वाटायले.
अर्थीक वर्स 2023-24 त दळान 196 जाणांचे जीव वाटायल्ले. जाल्यार अऱ्थीक वर्स 2024-25 त दळाक 417 जाणांक जिवदान दिवपाक येस आयलां. 2023-24 त दळान 33.35 कोटी रुपयांची मालमत्ता आनी 692 जनावरांक वाटायल्ले. 2024-25 त 26.51 कोटींची मालमत्ता आनी 782 जनावरांक वाटावपाक येस आयलां.
मेळिल्ले म्हायती प्रमाण 2024-25 त उजो पालोवपी दळाक 8966 कॉल आयिल्ले. तातूंतले सगळ्यांत चड 4141 कॉल पावस वा हवामान विशींचे आपत्ती खातीर आशिल्ले. जाल्यार उज्या संबंदांत 2676, हेर आपत्कालीन 2066, उदका संबंदांत 55 जाल्यार पालसणां कोसळप आनी हेर गजालीं खातीर 28 कॉल आशिल्ले. म्हाल निहाय पळयल्यार बार्देसांत सगळ्यांत चड 1490 कॉल आयिल्ले. साश्टींतल्यान 1317, तिसवाडींतल्यान 1204, फोंडें सावन 1135, दिवचल सावन 827, सत्तरींतल्यान 679, पेडणें सावन 618 कॉल आयिल्ले. ह्या काळांत विवीध आपत्कालीन घडणुकांनी सुमार 14.16 कोटींचे मालमत्तेचें लुकसाण जालें. हे मजगतीं, गोंयांतल्या विवीध उज्याच्या आनी हेर आपत्कालीन घडणुकांनी 124 व्यक्ती आनी 57 जनावरांक मरण आयलें. फाटल्या अर्थीक वर्सांत उजो पालोवपी दळाक पावस वा हवामान संबंदांतल्या दुर्घटणां खातीर 4141 कॉलांतले सगळ्यांत चड 438 कॉल हे दिवचल केंद्रांत आयिल्ले. ते उपरांत वाळपय स्टेशनाचेर 424 कॉल आयिल्ले.
रान वाठारांत उज्या खातीर 185 कॉल
2024-25 त रान वाठारांत लागिल्ल्या उज्या संबंदांत 185 कॉल आयिल्ले. तातूंतले सगळ्यांत चड कॉल दिवचल केंद्रांत आयिल्ले. वयल्या काळांत सुकिल्ल्या कड्डाक लागिल्ल्या उज्या संबंदांत 1328, कोयर वा कावलां अड्ड्यांच्या उज्या खातीर 177, राबितो वाठारांतल्या उज्या खातीर 169 जाल्यार विद्यूत उपकरणा संबंदांतल्या उज्या खातीर 148 कॉल आयिल्ले, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
