भांगरभूंय | प्रतिनिधी
रास्ता रोको करपाची थळाव्या लोकांची शिटकावणी
पेडणें: राष्ट्रीय म्हामार्ग 66 वयल्या पोरस्कडे भटापावणे वचपी रस्त्या वयल्या जंक्सनाचेर कसलेच तरेचें सर्कल वा भुंयगत रस्तो नाशिल्ल्यान राष्ट्रीय म्हामार्ग हुपतना व्हड प्रमाणार आडखळी येतात तशेंच अपघातूय जातात. हो वाठार अपघाती वाठार म्हूण नांवारुपाक येता. थंय सरकारान ताकतिकेन सर्कल उबारून ही गैरसोय पयस करची. ना जाल्यार रस्त्याचेर देंवून रास्ता रोको आंदोलन करचें पडटलें, अशी शिटकावणी पोरस्कडें न्हंयबाग भटपावणी वाठारांतल्या लोकांनी दिल्या.
ह्या वेळार इजिदोर फर्नांडीस, एकनाथ तेली, मधू पालयेंकार हांचे सयत साबार थळावे लोक हाजीर आशिल्ले.
हे संबंदांत पंचायतीन थाराव घेवन संबंदीत खात्याक धाडला. आमदार प्रवीण आर्लेकार हांकांय निवेदन सादर केलां. त्या जंक्शनाचेर पावले उपरांत खंयची गाडी खंयचे वटेन वता हाचो पत्तो लागना. येरादारी पुलीस ह्या जंक्शनाचेर दीसभर तैनात करचो, अशी मागणी लोकांनी ह्या वेळार केली.
राष्ट्रीय म्हामार्ग 66 चें काम एमव्हीआर कंपनी करता. तिचो कंत्राटदार मनमानी पद्दतीन ह्या रस्त्याचें काम करता. ह्या रस्त्याचो आराख़डो एकाय पंचायती कडेन ना. आपल्याक जाय तशें रस्त्याचें रुंदीकरण करता. जंय भुंयगत रस्तो, उड्डाण पुलाची गरज आसा, थंय ते बांदूंक नात. सर्वीस रस्ते करचे आदींच राष्ट्रीय म्हामार्गाच्या रुंदीकरणाक हात घातला. कांय रस्त्याचे कुशीक जीं जंक्शना आसात, थंय सर्कल बांदूंक ना. सिग्नलां बसोवंक नात, दिशा दाखोवपी तकटे लावंक ना. रस्त्याचे कुशीक जे दोंगर आसात, ते उब्बे कातरिल्ल्यान पावसाळ्यांत पालसणां कोसळटात. अश्यो कितल्योश्योच समस्या कंत्राटदारान निर्माण करून दवरल्यात. पत्रादेवी ते धारगळ म्हाखान मेरेन झीगझॅक पद्दतीन बांदिल्लो रस्तो खूब कडेन नेमला. हो रस्तो खऱ्यांनीच काँक्रिटाचो आसा काय डांबराचो होवूय प्रस्न उपस्थीत जाला. रस्त्याचेर लायटी घालूंक नाशिल्ल्यान रातच्या वेळार बिण्ण काळोख पातळटा. हेवूय एक अपघाताक कारण थारता, अशें थळाव्या लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
