भांगरभूंय | प्रतिनिधी
भांगरभूंय । प्रतिनिधी
पेडणेः मुंबय उच्च न्यायालयान निर्बंध घातिल्ले आसतनाय पेडणे तालुक्यांत शापोरा आनी तेरेखोल न्हंयेंतल्यान रातया रेंव काडपाचे प्रकार सुरू आशिल्ल्यान भरारी पगंडाचे मुखेली आनी पेडण्याचो मामलेदार अनंत मळीक हांणी मंगळाराक पोरस्कडें हांगा छापो घालून होंडीं आनी कांय प्रमाणांत रेंव जप्त केली. तेरेखोल न्हंय देगेर आशिल्लीं चार होडीं आनी सुमार 30 घनमीटर रेंव जप्त केल्या.
मामलेदार मळीक हांच्या फुडारपणा खाला केल्ले हे कारवायेंत तेरेखोल कोस्टल पुलीस स्टेशनाचे सहाय्यक निरीक्षक सुरेश कवठणकार, संदेश वरक, सचीन खोर्जुवेकार, तलाठी भानुदास कळंगुटकार वांटेकार जाल्ले. न्यायालयाचे निर्बंध आसतनाय शापोरा आनी तेरेखोल न्हंयेंतल्यान फाटल्या देड म्हयन्या सावन रातयां रेंव काडपाचे प्रकार सुरू आशिल्ल्याची म्हायती मेळ्ळ्या. रेंव काडून ती दोंगराळ वाठारांत दवोरतात. रेंव काडटात तो वाठार सूर्य उदेवचे पयलीं नितळ करून सरकारी यंत्रणेच्या दोळ्यांत उदक लावपाचे प्रकार जातात अशें थळावे लोक सांगतात.
राजकारण्याचें समर्थक रातयां रेंव काडपाचो धंदो करतात अशें लोकांचें म्हणणे आसा. एक होडें रेंव काडल्यार ह्या समर्थकांक 27 हजार रुपये हप्तो दिवचो पडटा अशें एक बांदकाम वेवसायिकांन आपलें नांव उक्तें करपाचें ना हे अटीचेर उलयतना सांगलें. रेंव वेवसायांतल्यान म्हयन्याक लाखांनी रुपयांची वसुली करपाचें काम चलतां अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
