भांगरभूंय | प्रतिनिधी
सांखळी- विठ्ठलापुर, दिवचल पुलाची पळोवणी, तीन म्हयन्यांत अहवाल सादर
भांगरभूंय । प्रतिनिधी
पणजी : गोंयांतल्या पोरण्या पुलांचें स्ट्रक्चरल ऑडीट (सर्वेक्षण) मुंबयचे स्ट्रक्टवेल डिझायन अॅण्ड कन्सलटन्सी कंपनी कडल्यान सुरू जालां. कंपनीच्या अधिकाऱ्यांनी सांखळे आनी दिवचलच्या पुलांची तपासणी केल्या. कंपनी पुराय गोंयांतल्या हजारभर सांकव – पुलांचें स्ट्रक्चरल ऑडीट करून सरकाराक अहवाल सादर करतली.
गोंयांत पुर्तुगीज तेंपा वयले पूल तशेंच सांकवांची संख्या खूब आसा. सुरक्षेचे नदरेंतल्यान हाचे आदीं पुलांचें स्ट्रक्चरल ऑडीट केन्नाच जावंक नाशिल्लें. आतां तें सुरू जालां. पूल तशेंच सांकव मेळून उत्तर गोंयांत 600 जाल्यार दक्षीण गोंयांत 400 पूल आसात. सध्या उत्तर गोंयांतल्या पुलांची पळोवणी सुरू आसा, अशी म्हायती स्ट्रक्टवेल डिजायन अॅण्ड कन्सल्टन्सी कंपनीचे प्रकल्प वेवस्थापक चंद्रशेखर हांणी दिली.
आतांच आमी पळोवणीचो वावर सुरू केला. तीन म्हयन्यांत काम पुराय जातलें. हाचे उपरांत आमी अहवाल सादर करतले. खंयचो पूल वा सांकव कितले टक्के सुरक्षीत आसा, सुरक्षे खातीर उपाय येवजण्यो हाची म्हायती अहवालांत दितले. बुधवारा सांखळी – विठ्ठलापूर पुलाची पळोवणी केली. ह्या पुलाचे पळोवणे सात ते आठ वरां लागलीं. बिरेस्तारा दिवचलच्या पुलाची पळोवणी केली. अभियंते आनी तंत्रज्ञ हांचोन आमी पंगड केला. विवीध पंगड एकेका पुलाची पळोवणी करता. पळोवणी करतना भौशीक बांदकाम खात्याचे अधिकारी हाजीर आसतात. दिवचल पुलाचे पळोवणे वेळार सहाय्यक अभियंता रश्मी मयेंकार हाजीर आशिल्ली. दिवचलचो आदलो पूल 1962 त बांदिल्लो. ह्या पुलाची किरकोळ दुरुस्ती करपाची गरज आसा. हो पूल सुरक्षीत आशिल्ल्याचें पळोवणी उपरांत सांगलां, अशी म्हायती अभियंता रश्मी मयेंकार हांणी दिली.
पुलांची पळोवणी केल्या उपरांत तांचे फोटो घेवन काँक्रीट, स्टील हांचो अभ्यास तज्ज्ञ करतात. अभ्यासा उपरांतूच भाश्य करप शक्य आसा, अशी म्हायती चंद्रेशेखर हांणी दिली.
दिवचल पुलाची पळोवणी करतना थळावे आमदार डॉ. चंद्रकांत शेट्ये हाजीर आशिल्ले. दिवचले मुखेल न्हंयेचेर दोन पूल आसात. एक पूल खूब पोरणो आसा. एक नवो आसा. पोरण्या पुलाची पळोवणी करप गरजेचें आशिल्ले. तशेच अस्नोडेंचे पार न्हंये वयलो पूल लेगीत खूब पोरणो आसा. ह्या पुलाचे सुरक्षितताये विशीं तपासणी जावपाक जाय. पोरण्या पुलांची तपासणी जावप ही बरी गजाल. साळ, अडवलपाल वाठारांत पोरणे सांकव आसा. ह्या सांकवा वयल्यान खूब येरादारी जाता. ह्या सांकवांची पळोवणी दोन दिसांत जातली, अशें दिवचलचे आमदार डॉ. चंद्रकांत शेट्ये हांणी सांगलें.
स्ट्रक्टवेल डिजायन अॅण्ड कन्सल्टन्सी कंपनीक स्ट्रक्चरल ऑडीट करून अहवाल दिवपा खातीर 17 कोटींचें कंत्राट दिलां. कंपनी ऑडीट करून सुरक्षितताये विशीं निश्कर्श दितले. तशेंच उपाय येवजण्यो सुचयतले. उपाय येवजण्यो कोणी करच्यो, हे विशीं सरकार उपरांत निर्णय घेतलो, अशी म्हायती भौशीक बांदकाम खात्याच्या अभियंत्यांनी दिली.
गोंयांतले सांकव 2 ते 6 मिटर लांबायेचे आसात. कांय पूल 6 ते 30 मिटर मेरेन आसात. 30 मिटरां परस लांब पुलांचो आंकडो 57 आसा. 30 मिटरां परस लांब आशिल्ल्या सगळ्यां पुलांचें ऑडीट जातलें. येरादारी चड जावपी सांकवांची पळोवणी जातली. सांकव तशेंच पुलांचो वट्ट आंकडो 2 हजारां वयर आसलो तरी हजारभर पूल आनी सांकवांचें ऑडीट जातलें. खांडेपार, उसगांवां नवे पूल बांदल्यात, तरी लेगीत पोरण्या पुलाचो लेगीत वापर जाता. ह्या पुलांची पळोवणी जातली.
—
दिवचल, अस्नोडें वरी खूब पोरणे पूल आसात. सुरक्षेचे नदरेन पुलांचें स्ट्रक्चरल ऑडीट जावप गरजेचें आसा.
डॉ. चंद्रकांत शेट्ये, आमदार, दिवचल
—
उत्तर आनी दक्षीण गोंय मेळून हजारभर पुलांची पळोवणी करून ऑडीट करतले. तीन म्हयन्यां उपरांत सरकाराक अहवाल सादर करतले.
चंद्रशेखर, प्रकल्प व्यवस्थापक, स्ट्रक्टवेल डिझायन अॅण्ड कन्सल्टंसी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
