भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरण्या गोंयांत गोंयच्या सायबाच्या फेस्ता खातीर येवपी भाविकां खातीर गोंय शीख युथान (जीएसवाय) ‘गुरू का लंगर’ सुरू केलां. फेस्ताच्या नोव्हेंना खातीर येवपी देश- विदेशांतल्या भाविकांच्या अल्पोपहाराची वेवस्था ह्या लंगरांत केल्या. पोरण्या गोंयात बाखिया भाटांत केल्या. थंय भाविकांक फुकट खावपाचे जिनस दितात.
गोंयांत चर्चीच्या फेस्ता वेळार सुरू केल्लें हें पयलेंच लंगर आसा अशें गोंय शीख युथाचो अध्यक्ष संदीप सरताज हांणी सांगलें. लंगर सुरू करपाचो विचार आमी फाटल्या दोन वर्सां सावन करताले. कसलोच भेदभाव करनास्तना मानवतेची सेवा हे नदरेंतल्यान आमी हे लंगर सेवे कडेन पळयतात. 3 डिसेंबराक फेस्ताच्या दिसा ही लंगर सेवा सुरू आसतली अशी म्हायती तांणी दिली. गोंयांत सगल्या धर्मांतल्या लोकां मदीं जो भावचार आसा तो मतींत दवोरून आमी अंदू हें लंगर सुरू केलां अशें लंगर समितीचो वांगडा सिदार्थ मेहता हांणी सांगलें.
मारयाण फेर्रांव आनी आर्थुर डिसोझा हांणी लंगर सेवा सुरू केल्ले खातीर गोयांतल्या शीख समाजाचे उपकार मानल्यात. कोवीडाच्या तेपार शीख समाजान जीएमसी वाठारांत लंगर सुरू करून गोंयकारांचेर व्हड उपकार केल्ले. पोरण्या गोंयांत फेस्ताच्या वेळार लंगर सुरू करपाची इत्सा तांणी म्हजे लागीं उक्तायल्ली अशें डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
