भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरण्या गोंयांतल्या सेंट फ्रान्सिस झेवियर फेस्ताच्या नोव्हेंनांक बिरेस्तारा धर्मीक कार्यावळींनी सुरवात जाली. पयल्या दिसा आयोजीत केल्ल्या मिसांक (प्रार्थना सभा) शेकड्यांनी लोकांनी वांटो घेतलो. सकाळीं 6 वरांचेर पयलें आनी सांजे 6 वरांचेर निमाणे मीस जालें.
नोव्हेंना आनी फेस्ता खातीर पोरण्या गोंयांत सगळे तरेची वेवस्था केल्या. पुलीस, येरादारी पुलीस आनी आप वावुरपी सगळी वेवस्थेचेर नदर आसा. सेंन्ट आगुस्तीत टॉवराच्या वाठारांत एक जायरात कंपनीचें जायराती शूटिंगाक लागून बिरेस्तारा सकाळी येरादारीक आडमेळे आयले. नोव्हेंना आनी फेस्ता वेळार शूटिंग करपाक परवानगी कशी दिली असो प्रश्न ग्लेन काब्राल हांणी विचारला. 24 नोव्हेंबर तें 4 डिसेंबर मजगतीं पोरण्या गोंयांत येरादारीच समस्या उप्रासतना. तातूंत जायराती खातीर शूटिंग करपाक परवानगी दिवप म्हणल्यार ती वाडोवप अशें तांणे सांगलें.
जायरात शूटिगाक लागून भाविकांची गैरसोय जाली अशें सान्ता मोनिका कॉन्व्हेन्टची सिश्टर सिल्वी हिणे सांगलें. शूटींग करतल्यान आगुस्तीत टॉवरा कडले रस्ते आडायले. विचारपाक गेल्यार तें आमच्या आंगार आयले अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
