भांगरभूंय | प्रतिनिधी
भांगरभूंय । प्रतिनिधी
बेळगांवः पोरण्या गोंयांतल्या सेंट फ्रान्सिस झेवियर हांच्या 3 डिसेंबराक जावपी फेस्ता खातीर बेळगांवच्या घाटमाथ्या वयले सुमार एक हजार भावीक पदयात्रा करून गोंयांत येतात. हे पदयात्रेंत एका चार वर्साच्या भुरग्यांचो आनी 75 वर्सां पिरायेच्या भाविकाचो आसपाव आसा. बिरेस्तार सांजे हे पदयात्री दिवचले पावले. अवर लेडी ऑफ ग्रेस चर्च वाठारांत मुक्काम करून शुक्राराक सकाळीं 10.30 वरांचेर ते पोरण्या गोंयांत पावतले.
घाटमाथ्या वयल्यान सुमार 250 किलोमीटर अंतर चलून गोंयच्या सायबाच्या फेस्ताक येवपाची परंपरा फाटल्या 42 वर्सां सावन सुरू आसा. आपूण चलत गोंयांत येता आनी उपरांत वर्सभर फीट उरतां अशें 75 वर्सां पिरायेचो निवृत्त शिक्षक फास्कू (पास्कोल) फ्रान्सिस बार्देसकार हांणे सांगलें. पदयात्रेंत एक वेगळीच अनुभूती मेळटा अशें तांणे सांगलें. अदूंचे हे पदयात्रेंत मारूती कोश्टी आनी दीपक कारकांदे हे वांटेकार जाल्यात. विशेश म्हणल्यार अडकूर गांवांतलो एक कुत्रो ह्या पदयात्रेंत आसा.
बेळगांव तशेंच कोल्हापूरच्या घाटमाथ्यार राबितो करून आशिल्ले मूळ गोंयकार दर वर्सा चलत गोंयांत येतात. फाटल्या सोमाराक हे पदयात्रेक सुरवात जाल्ली. हे पदयात्रेक 42 वर्सां आदीं उत्तर कर्नाटकांतल्या जेजुइट प्रादीन स्वामी पंथ स्विकारून फादर प्रभूधर हें नांव घेतलें आनी ताणे हे पदयात्रेक सुरवात केली. पश्चीम कोल्हापुरांतल्या आजरा गांवातल्या सात जाण तेन्ना तातूंत आशिल्ले. 2020 वर्सा कोरोनाक लागून ही यात्रा जावपाक शकली ना. गडहिंग्लज, आजरा, कोल्हापूर, इचलकरंजी, बेळगांव वाठारांतले भाविक चलून गोंयांत येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
