भांगरभूंय | प्रतिनिधी
म्हापशें, प्रतिनिधी ः पणजे- मालीमच्या पोरण्यां मांडवी पुलाचेर मोटारीन उरफाटे दिकेन येवन तीन स्कुटरींक धपको दिलो. ह्या अपघातांत स्कुटरीं वेले तिग जाण जखमी जाल्यात. तातूंतल्या एकल्याचेर जीएमसींत उपचार चलतात. जखमीं मदीं संदेश नायक (पणजी), यश भूतानी (मूळ राजस्थान) आनी फारूक अन्सारी (पिळर्ण) हांचो आस्पाव आसा.
शेनवारा फांतोडेर चार वरांच्या सुमाराक हो अपघात जालो. युहान मॅथीव (रा. शिवोले मुळ दिल्ली) हो जीए 03 डब्ल्यू 7918 क्रमांकाची रेंट अ कॅब मोटार घेवन पणजे सावन पर्वरी वटेन वतालो. जाल्यार उरफाटे दिकेन जीए 02 एडी 2032 ह्या क्रमांकाच्या अॅक्टीवा स्कुटरीवेल्यान संदेश नायक, जीए 03 एएन 4188 ह्या ज्यूपीटर स्कुटरीवेल्यान फारूक अन्सारी आनी आर जे 28 ईएस 1498 ह्या बुलेटीवेल्यान यश भुतानी हे तिगूय वताले.
गाडयेच्या ड्रायव्हराचो मालीम वटेनच्या मांडवी पोरण्यां पुलाचेर पावतकच गाडयेवेले नियंत्रण सुटले आनी चुकीचे दिकेन वचून पयलीं अॅक्टीवा आनी मागीर हेर स्कुटरींक नेटान धपको दिलो.
ह्या अपघातांत स्कुटरींवेले तिगूय जखमी जाले. जखमींक 108 एम्ब्युलन्सींतल्यान उपचारा खातीर जीएमसींत व्हेले. उपचारा उपरांत फारूक आनी यश हांकां डिस्चार्ज दिलो. जाल्यार संदेश नायक हाचेर उपचार चलतात.
पर्वरे पुलिसांक ह्या अपघाताची म्हायती मेळ्ळे उपरांत हवालदार संदीप घोडगे हांणी घडणूक सुवातेर वचून पंचनामो केलो. तशेंच मोटार ड्रायव्हर युहान मॅथीव हाची म्हापश्यां जिल्लो हॉस्पिटलांत अल्कोहोल चांचणी जाली. पुलीस निरिक्षक राहुल परब हांच्या फुडारपणा खाला पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
