पोरणें दायज तिगोवन फुडले पिळगे मेरेन पावोवंक जाय: उपराष्ट्रपती धनखड
भांगरभूंय | प्रतिनिधी
पणजी : पोरण्या भारतांतलें गिन्यानाचें समृद्ध दायज तिगोवन तें फुडले पिळगे मेरेन पावोवपाक जाय, अशें उपराष्ट्रपती जगदीप धनखड हांणी सांगलें. बिरेस्तारा राजभवनांत महर्षी सुश्रुत आनी आचार्य चरक हांच्या पुतळ्यांच्या अनावरण सुवाळ्याक ते उलयताले. ह्या वेळार मुख्यमंत्री डॉ. प्रमोद सावंत, राज्यपाल श्रीधरन पिल्लई, केंद्रीय मंत्री श्रीपाद नायक, खासदार सदानंद शेट तानावडे, मंत्री सुदीन ढवळीकार, प्रदेशाध्यक्ष दामू नायक आनी हेर आमदार हजर आशिल्ले.
प्राचीन भारतांत वैजकी, वास्तुशास्त्र, गणित, योग, खगोलशास्त्राचें गिरेस्त दायज आशिल्लें. आपल्या गिन्यानाचें हें समृद्ध दायज फुडले पिळगे मेरेन पावोवपाक जाय. तांकां आमचे वेद, इतिहास, संस्कृती हांची म्हायती दिवपाक जाय. आमी हे गजालींत आपलीं मुळां सोदून तीं घट्ट करपाक जाय.
प्राचीन भारतीय ग्रंथ फकत वाचपा पुरते मर्यादीत दवरचे न्हय. तांचें भाशांतर डिजिटायझेशन करून ते नवे पिळगे मेरेन पावोवचें. तांचो नव्यान अभ्यास करून सध्याच्या युगाक भेकडावपी समस्यांचेर उपाय सोदपाक जाय, अशें मत उपराष्ट्रपती धनखड हांणी उक्तायलें.
योग भारतान संवसाराक दिल्ली भेटवस्त. अथर्ववेद म्हळ्यार वैजकी उपचार पद्धती खातीर भांगराची खाण. सुश्रुतान ३०० परस चड सर्जरी केल्ल्यो. तांणी शंभरां परस चड सर्जिकल उपकरणां केल्लीं. पाश्चिमात्य देशांनीय सुश्रुताची म्हायती मान्य केल्या. आपल्या ज्ञानाच्या ह्या दायजा कडेन हाचे पयलीं सामकी आडनदर जाल्ली. मात २०१४ उपरांत ह्या गजालीं कडेन लक्ष दिवन ताचेर काम सुरू जालां. आयज संवसारान योगाक स्वीकारलां. आयुष मंत्रालयाची स्थापना करून पर्यायी उपचार पद्धत चालीक लायिल्ल्याचें धनखड हांणी म्हणलें.
दुयेंसां उणीं करपाक आयुर्वेद ऋतुचर्या गरजेचें
मुख्यमंत्री डॉ. सावंत हांणी, आयुर्वेदांतल्या दिनचर्या, ऋतुचर्या पाळ्ळ्यार क्रॉनीक दुयेंसांचें प्रमाण उणें जावपाक शकता. आयुर्वेदीक दोतोरांनी प्रतिबंधात्मक उपचार पद्धतींचो अभ्यास करचो. राजभवनांत उबारिल्ले चरक आनी सुश्रुत हांचे पुतळे आयुर्वेदाचें म्हत्व अधोरेखीत करतात. ह्या विशयांनी आवड आशिल्ल्यांनी व्हडा संख्येन गोंयच्या राजभवनाक भेट दिवन हे पुतळे तशेच हांगच्या वामन वृक्ष कलेचे प्रयोग मुजरय पळोवचे.
ऑपरेशन सिंदूर गरजेचें
‘ऑपरेशन सिंदूराक लागून भारत दहशतवाद सोंसून घेवचो ना’, असो संदेश सगल्या संवसाराक पावला. अशें ऑपरेशन करप सामकें गरजेचें आशिल्लें. हाका लागून भारताचे सामर्थ्य संवसाराक समजलां. भारताचो आतंकवादा आडचो लढो ह्यान फुडेंय चालूच उरतलो अशें उपराष्ट्रपती धनखड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
