भांगरभूंय | प्रतिनिधी
पणजी : पोरणें गोंय पुलिसांनी कदंब पठार आनी ताका तेंकून आशिल्ल्या वाठारांत रावपी खासा बिराडकारांची पडटाळणी मोहीम चालीक लायली. ह्या वाठरांत अनधिकृत रावप्यांची वळख पटची आनी गुन्यांवकारी प्रवृत्तीचो प्रतिबंध जावचे खातीर ही मोहीम हातांत घेतिल्ली.
हे मोहिमे मजगतीं पोरणें गोंय चर्च, चिंबल, मेरशी मार्केट आनी सांता क्रूझ मार्केट वाठारांत पुलिसांनी नाकाबंदी केली. पुलिसांनी दुबावितांचेर बारकायेन नदर दवरीत चवकशी केली. हे मोहिमे खाला पुलिसांनी ८ जणांक प्रतिबंधात्मक स्वरूपांत अटक केली. तांतल्या ५ जाणांचेर दुबावी हालचालींचे फाटभूंयेर कारवाय केली. तशेंच, ५ जाणांचेर भौशीक सुवातांचेर सोरो पियेल्ल्या प्रकरणांत गुन्यांव दाखल केले. तशेंच, कोटपा कायद्या खाला १७ जाणांचेर दंडात्मक कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
