भांगरभूंय | प्रतिनिधी
विश्वजीत राणे : भलायकी मळार तयार जातल्यो 5 ते 7 हजार नोकऱ्यो
भांगरभूंय । प्रतिनिधी
पणजी : पोरणें गोंय चर्च वाठारांत कसलेंच बांदकाम येवचें न्हय हे खातीर 200 मिटरांचो बफर झोन आसतलो. कांय लोक हेरांची दिशाभूल करतात. इतिहासीक दायज थल आशिल्ल्या चर्चा वाठारांत बांदकामांक परवानगी मेळची ना, अशें नगरनियोजन तशेंच भलायकी मंत्री विश्वजीत राणे हांणी सांगलें. भलायकी मळार फुडल्या वर्सा 5 ते 7 हजार नोकऱ्यो तयार जातल्यो, अशेंय तांणी सांगलें.
खोर्लीच्या मोंटफोर्ट अकादमींत जाल्ल्या मेगा भलायकी शिबिराच्या उक्तावण सुवाळ्यांत राणे उलयताले.
पुराय गोंयांत गरजेच्यो भलायकी सुविधा उबारचे खातीर सरकार बांदील आसा. भलायकी मळार येता त्या काळांत 5 ते 7 हजार नोकऱ्यो तयार जातल्यो. थळावे पंच तशेंच हेरांनी आमदारा वरवीं मागण्यो वा सुचोवण्यो आपले मेरेन पावोवच्यो. त्यो निश्चीत पुराय करतले, अशें राणे हांणी सांगलें.
दक्षीण गोंय जिल्हो हॉस्पिटल सुरू जालां, पूण गरजेचे विभाग सुरू जावंक नात. न्युरोलॉजी, न्युरोसर्जरी, कार्डीओलॉजी, ओर्थोपेडीक हे विभाग जे मेरेन सुरू जायनात, ते मेरेन दक्षीण गोंय जिल्हो हॉस्पिटल पुराय तांकीन सुरू जालां अशें म्हणपाक मेळचें ना, अशें राणे हांणी सांगलें.
ह्या वेळार कुमारजुंवेंचे आमदार राजेश फळदेसाय, सरपंच, पंच आनी हेर मानेस्त हाजीर आशिल्ले. दिवाडे 10 खाटींचे हॉस्पिटल बांदपाची मागणी आमदार राजेश फळदेसाय हांणी केली. हॉस्पिटला खातीर जमीन आसा. येता ते वेंचणुके खातीर भलायकी मंत्र्यान हॉस्पिटलाचें काम सुरू करपाचें आस्वासन दिलां. तशेंच कुमारजुंव्यां लेगीत 10 खाटींचें हॉस्पिटल बांदपाची मागणी आमदार फळदेसाय हांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
