भांगरभूंय | प्रतिनिधी
भांगरभूंय । प्रतिनिधी
पणजीः पोरणें गोंयां दायज थळाचे शिमे भितर आशिल्ल्या वादग्रस्त बंगल्या वयल्यान सभाघराचें वातावरण बरेच तापलें. हो बंगलो मोडून उडोवपाची मागणी करत विरोधकांनी सभापतींच्या हौदात धांव घेतली. उपरांत विधनासभेचें कामकाज स्थगीत जालें. कामकाज परत सुरू जावन लेगीत विरोधकांनी ह्या विशयाचेर बोवाळ चालूच दवरलो.
प्रश्नोतर वरां वेळार विरोधी पक्ष फुडारी युरी आलेमांव हांणी पोरणें गोंयां वादग्रस्त बंगल्याचेर सरकाराक वडीर काडलें.
दायज वाठारांत बेकायदो बंगल्याचें बांदकाम जालां आनी ताचे आड कारवाय करपाक सरकाराक अपेस आयला. ह्या बंगल्या आड कारवाय करपाक खंयचे खातें जापसालदार आसा? हो बंगलो कोणे हाडला? हाच्यो जापो आमकां जाय, अशी मागणी आलेमांव हांणी केली.
हो विशय म्हज्या खात्याक लागना ते भायर हो विशय न्यायालयांत प्रलंबीत आशिल्ले कारणान हाचेर जाप दिवपाक मेळना अशी जाप पुरातत्व मंत्री सुभाष फळदेसाय हांणी दिलें.
दायज थळ वाठारांतल्या बफर झोनांत 54 बेकायदो बांधकामां आयल्यांत. ही बांधकामां आनी हो बंगलो केन्ना मोडटले? ह्या बंगल्याक राजकी राखण आसा काय? असो प्रश्न आलेमांव हांणी विचारून सभापतींच्या हौदात धांव घेतली आनी हेर विरोधकांचे तांकां तेंको मेळ्ळो.
विरोधक विधानसभेचो वेळ वगडायतात आनी तांका कामकाज फुडें व्हरपाचे ना, असो आरोप मुख्यमंत्री डॉ. प्रमोद सावंत हांणी केलो. हो विशय न्यायालयांत प्रलंबीत आसा. ते भायर पुरातन थळा राखपा खातीर सरकार सेगीत यत्न करत आयलां, अशें स्पश्टीकरण मुख्यमंत्र्यान दिलें.
विरोधकांनी बंगलो मोडात अश्यो घोशणा दिवप चालूच दवरल्यो. ह्या बोवाळा मजगतीं सभापती रमेश तवडकार हांणी विधानसभेचें कामकाज 10 मिनटां स्थगीत केलें. कामकाज परत सुरू जाले उपरांत विरोधकांनी ह्या बंगल्या आड तखटे दाखोवन आपलो निशेध करप चालूच दवरलें. काय वेळा उपरांत बोवाळ थंड जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
