भांगरभूंय | प्रतिनिधी
खबरां संस्था
व्हॅटिकन : क्रिस्तांव कॅथोलीक धर्मीक फुडारी पोप फ्रान्सीस हांचे कुडीचेर रोमांतल्या सांता मारिया मॅगिओर बॅसिलिकांत निमाणे संस्कार केले. कुडीचेर निमाणे संस्कार करचे खातीर थंय एक ल्हानशी प्रार्थना केली. तांच्या निमाण्या संस्कारचे थेट प्रक्षेपण करूंक ना.
ही सुवात सेंट पिटर्स स्क्वेअरा सावन सुमार 4 किलोमिटर अंतराचेर आसा. आपले कुडीचेर सादे सिमितरींत निमाणे संस्कार करचे. आपल्या थडग्याचेर फक्त फ्रान्सीस हें नांव आसचें, अशी पोप फ्रान्सीस हांची निमाणी इत्सा आशिल्ली.
सेंट पिटर्स स्क्वेअरांत पोप हांच्या निमाण्या संस्काराचे विधी दनपारां 1.30 वरांचेर सुरू जाले आनी सुमार तीन वरां चल्ले. तांची कूड सेंट पिटर बॅसिलिकांतल्यान काडली आनी सेंट पिटर स्क्वेअरांत दवरली, थंय प्रार्थना सभा आयोजीत केल्ली. पोप हांच्या निमाण्या संस्काराक सुमार अडेज लाख लोक जमिल्ले.
पोप हांचे कुडीचे निमाणे दर्शन घेवपा खातीर 170 देशांचे प्रतिनिधी आयिल्ले. तातूंत भारताची राष्ट्रपती द्रौपदी मुर्मू, अमेरिकेचे अध्यक्ष डोनाल्ड ट्रम्प, अर्जेंटिनाचे अध्यक्ष झेवियर मिले, ब्रिटीश प्रधानमंत्री कीर स्टार्मर आनी फ्रान्साचे अध्यक्ष इमॅन्युएल मॅक्रॉन हांचो आस्पाव आसलो. 21 एप्रीलाक 88 वर्सां पिरायेचे पोप फ्रान्सीस संवसाराक अंतरिल्ले. फाटल्या तीन दिसां सावन तांची कूड निमाण्या दर्शना खातीर सेंट पिटर्स बॅसिलिकांतल्या काशांवांत दवरिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
