भांगरभूंय | प्रतिनिधी
व्हॅटिकन, खबरा संस्था : क्रिस्तांव समाजाचे सर्वोच्च धर्मगुरू, पोप फ्रान्सीस (८८) संवसाराक अंतरले. ते रोमन कॅथलीक चर्चीचे पयले लॅटिन अमेरिकन फुडारी आशिल्ले. फाटल्या कांय दिसां सावन ते किडणीच्या दुयेंसा कडेन झुजताले. तांकां न्यूमोनियाय जाल्लो. बरेच दीस उपचार घेवन ते घरा परतले. कार्डिनल केविन फॅरेल हांणी पापसायबाच्या मरणाची घोशणा केली. सकाळीं ७.३५ वरांचेर तांकां मरण आयलें, अशें तांणी सांगलें. तांच्या मरणाचेर संवसारांतल्या साबार देशांच्या अध्यक्ष, प्रधानमंत्र्यांनी दुख्ख उक्तायलां.
पोप फ्रान्सिस हांच्या मरणा उपरांत व्हॅटिकन सिटींत कॉन्क्लेव्हची प्रक्रिया सुरू जातली. हातूंत नव्या पोपची निवड करतले.
संवसारभर दुख्ख
फ्रान्साचे अध्यक्ष इमेन्युएल मॅन्क्रो हांणी पोपसायबाच्या मरणा विशीं दुख्ख उक्तावन, तांणी सदांच दुबळ्या लोकां वटेन रावन काम केलां, अशें सांगलें. झुज आनी क्रूरतायेच्या वेळार तांच्या मनांत सदांच दुसर्यां विशीं संवेदनशिलताय दिसताली. जर्मनीच्या चान्सलरानूय गरिबां खातीर तांणी केल्ल्या कार्याची इतिहासांत सदांच याद उरतली अशें म्हणलां. इझ्रायलाचे राष्ट्रपतीन म्हणलां, तांणी आपलें जिवीत गरिबांच्या उत्कर्शा खातीर आनी संवसारांत शांती पातळची म्हूण ओंपलें.
मार्चभर हॉस्पिटलांत
फेब्रुवारी म्हयन्यांत तांकां न्यूमोनिया जाल्ल्यान हॉस्पिटलांत दाखल केल्लें. पुराय मार्च म्हयनो ते हॉस्पिटलांत उपचार घेताले. २४ मार्चाक तांकां हॉस्पिटलांत डिस्चार्ज दिलो. त्याच दिसा तांणी घरा वतना हॉस्पिटला भायर जमिल्ल्या लोकांक आशिर्वादूय दिल्लो. पोप फ्रान्सीस हांकां तरणे पिरायेर फुफ्फुसाच्या संक्रमणाचो त्रास जाल्लो. हाका लागून तांचें एक फुफ्फुस काडिल्लें. ताचो परिणाम तांकां पुराय जीणभर जाणवलो. २०२३ वर्सा तांकां फुफ्फुसाच्या संसर्गाक लागून हॉस्पिटलांत दाखल केल्ले.
इस्टरा दिसा लोकां सामकार आयिल्ले
पोप फ्रान्सीस हे फाटल्या आयतारा इस्टरा पयलीं लोकां सामकार आयिल्ले. जायत्या म्हयन्यां उपरांत तांकां पळोवन लोकां मदीं उमेदीचें वातावरण निर्माण जाल्लें. मात कांय दिसांनी तांची भलायकी परत इबाडली आनी आयज तांणी निमाणो स्वास घेतलो.
२०२५ हें वर्स कॅथोलीक चर्चीन ज्युबली वर्स म्हणून जाहीर केल्लें. ह्या निमतान पोप फ्रान्सीस हांचो भारत दौरो जावपाची शक्यताय उक्तायताले. प्रधानमंत्री नरेंद्र मोदी आनी केंद्रीय मंत्री जॉर्ज कुरियन हांणी तांकां अधिकृत आमंत्रण दिल्लें. मात तांचे भलायकेच्या कारणाक लागून हो दौरो निश्चीत करूंक नाशिल्लो.
पोप फ्रान्सीस हांचें जिवीत
-जॉर्ज मारियो बर्गोग्लियो हें तांचें मूळ नांव. तांचो जल्म १७ डिसेंबर १९३६ दिसा जाल्लो.
-१९६९ त जेज्युएत ऑर्डरींत ते धर्मगुरू म्हूण नियुक्त जाले.
-१९७३-७९ मेरेन ते अर्जेंटीनांत धर्मीक फुडारी आशिल्ले.
-१९९२ त ब्यूनस आयर्स शाराचे सहायक बिशप आनी १९९८ त शाराचे आर्चबिशप जाले.
-२००१ त पोप जॉन पॉल दुसरे हांणी तांकां कार्डिनल केले.
-मार्च २०१३ त एके परिशदेंत तांकां पोपसायब म्हूण वेंचून काडले. १३०० वर्सांच्या काळांत ते पोप जावपी पयले बिगर युरोपीयन आशिल्ले.
-तांणी अपोस्टोलिक पॅलेसांतल्या व्हड पोप निवासांत रावपा बदला वेटिकन गेस्ट हावसांत रावप पसंत केलें.
-पोप फ्रान्सीस हांणी इटलीच्या भायर ४६५,००० किलोमिटर प्रवास केलो. ६५ परस चड वाठारांची भोंवडी केली.
पर्यावरणाच्या संरक्षणा खातीर कार्य
पोप फ्रान्सीस हांणी चर्चीचे विचारप्रणालींत आनी कार्यपद्धतींत व्हड बदल घडयले. तांणी गरीब, उपेक्षीत, स्थलांतरीत, जाण्टे आनी पर्यावरण राखपा खातीर आवाज काडलो. तांचें ‘Laudato Si’ हो धर्मसाहित्यीक दस्तऐवज पर्यावरण विशयाचेर संवसारीक चर्चेंतलो एक म्हत्वाचो टप्पो थारलो. समलैंगीक समुदाया संदर्भांतल्या सहिष्णुतापूर्ण भुमिकांनी, लैंगीक अत्याचार प्रकरणांचेर खर धोरणांनी आनी समाजीक समानतायेचेर लेखन-भाशणांनी तांणी आधुनीक काळांतले चर्चीक नवे दिकेन व्हेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
