भांगरभूंय | प्रतिनिधी
पणजी : फोंडें पोटवेंचणूक रद्द जावप हो गोंयच्या इतिहासातलो काळो दीस आसा. पोटवेंचणुकेत काँग्रेसीच्या जैताचो सुलूस लागिल्ल्यान भाजप आनी वेंचणूक आयोगान संगनमतान हो निर्णय घेतला. वेंचणूक आयोग हो भाजप सरकाराचो पपेट (कळसुत्री बावली) जाला, असो आरोप प्रदेश काँग्रेस अध्यक्ष अमित पाटकार हांणी केला.
फोंडें पोटवेंचणुके खातीर फाल्या 9 एप्रीलाक मतदान जावचें आशिल्ले. मतदानाच्या आदले दिसा वेंचणूक रद्द करपाचो आदेश मुंबय उच्च न्यायालयान दिला. कायदेशीर प्रक्रीये खातीर आमदार कार्लुस फेरेरा हांचो सल्लो घेतलो, अशें तांणी सांगला.
हो फकत फोंड पोटवेंचणुके पुरतो विशय ना. लोकशाय नश्ट करपी प्रक्रीयेचो हो भाग आसा. लोकांचे अधिकार सांबाळपी ज्यो घटनात्मक संस्था आसा तांचो राजकारणा खातीर गैरवापर करप भाजप सरकारा कडल्यान सुरू आसा.
पोटवेंचणुकेत भाजपा आड मतदान करून काँग्रेसीक जैत दिवपाचे फोंडेकारानी निश्चीत केल्ले. मतदानाक तोंड दिवपाचे सोडून पळून वोचपाचो हो प्रकार आसा, अशें अमित पाटकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
