भांगरभूंय | प्रतिनिधी
निकालाचेरूच जातलो सुदिन ढवळीकार हांच्या मंत्रीपदाचो निर्णय
पणजी: रितें मंत्रीपद भरपा बराबरूच मगोचे फुडारी सुदिन ढवळीकार हांच्या मंत्रीपदाचो निर्णय फोंडें पोटवेंचणुकेच्या निकाला उपरांतूच जातलो. हे नदरेन पळयत जाल्यार फोंडें पोटवेंचणुकेचो निकाल मंत्रीपदा खातीर इत्सूक आशिल्ले भाजप आमदार आनी मगो पक्षा खातीर म्हत्वपूर्ण थारतलो. फोंडें पोटवेंचणुकेंत मगो पक्षाची भाजपा बराबर युती आसून लेगीत मंत्री सुदिन ढवळीकार आनी मगोचे कांय कार्यकर्ते विरोधी उमेदवार डॉ. केतन भाटीकार हांकां मजत करीत आशिल्ल्याच्यो कागाळी भारतीय जनता पक्षा कडेन पावल्यात. हाची गंभीर दखल पक्षान घेतल्या आनी पोटवेंचणुके उपरांत मंत्रीमंडळांत व्हड फेरबदल जातल्याचें निश्चीत आसा.
भारतीय जनता पक्षांतल्या गोपां कडल्यान ही म्हायती मेळ्ळी. फोंडें पोटवेंचणुकेचो निकाल आनी येता ती विधानसभा वेंचणूक दोळ्या मुखार दवरून मंत्रीमंडळांत फेरबदल जातले.
सर्गेस्त रवी नायक हे भाजप सरकारांत शेतकी मंत्री आशिल्ले. तांकां आयिल्ल्या मरणाक लागून फोंडें मतदारसंघांत पोटवेंचणूक जाता. 9 एप्रील दिसा मतदान जावन 4 मे दिसा मतमेजणी जातली. रवी नायक हांच्या मरणाक लागून मंत्रीमंडळांतली एक सुवात रिती आसा. मुख्यमंत्री डॉ. प्रमोद सावंत हांचे कडेन डझनभर खातीं आसून लेगीत मंत्रीमंडळांतली रिती सुवात भरिल्ली ना. तशेंच रवी नायक हांचे कडेन आशिल्लीं खातीं लेगीत हेर मंत्र्यांक दिल्लीं नात. फोंडेंची पोटवेंचणूक जावंदी उपरांतूच निर्णय घेतले अशें मुख्यमंत्री डॉ. प्रमोद सावंत हांणी हाचे पयलींच स्पश्ट केलां.
फोंडें पोटवेंचणुकेंत अपेक्षे प्रमाण भाजपाची उमेदवारी स. रवी नायक हांचे पूत रितेश नायक हांकां मेळ्ळ्या. फाटले खेपेचे मगो पक्षाचे उमेदवार डॉ. केतन भाटीकार हांणी काँग्रेसीत प्रवेश करून काँग्रेसीची उमेदवारी मेळयल्या. आम आदमी पक्षानूय गीतेश नायक हांकां उमेदवारी दिल्या. फाटले खेपे डॉ. केतन भाटीकार हांणी स. रवी नायक हांकां खर झूज दिल्ली. फोंडें मतदारसंघांत 2012 वर्सा मगोचे सर्गेस्त लवू मामलेदार हांणी काँग्रेसी वतीन वेंचणूक लडोवपी स. रवी नायक हांकां हारयिल्लो.
फोंडें मतदारसंघांत मंत्री सुदिन ढवळीकार हांचे खूबशे कार्यकर्ते आसात. मगोचेय कांय परंपरीक मतदार आसात. डॉ. केतन भाटीकार हांचे मगो कार्यकर्ते आनी परंपरीक मतदारां कडेन लागींचे संबंद आसात. रितेश नायक हांच्या जैता खातीर मंत्री सुदिन ढवळीकार आनी मगोच्या कार्यकर्त्यांचे योगदान निर्णयाक थारतलें. हेच फाटभुंयेर फोंडें पोटवेंचणुके पयलीं मंत्रीमंडळा विशीं कसलोच निर्णय जावंक नाशिल्लो.
2022च्या विधानसभा वेंचणुके उपरांतूय कांय भाजप आमदारांचो मगोक मंत्रीपद दिवपाक विरोध आशिल्लो. फोंडें पोटवेंचणुकेंत भाजप उमेदवार हारत जाल्यार सुदिन ढवळीकार हांकां मंत्रीमंडळांतल्यान काडून उडोवपाची मागणी नेट धरतली.
भाजप सरकारांत मगोचे आमदार सुदिन ढवळीकार हे सेगीत मंत्री आसले तरी हाचे पयलीं दोन फावटीं भाजप मंत्रीमंडळांतल्यान तांकां काडून उडयिल्ले. हे फाटभुंयेर फोंडें पोटवेंचणूक निकाला उपरांत राजकी घडामोडी परतून एकदां नेट घेवपाच्यो आसात.
दोन फावटी ढवळीकार हांकां काडून उडयिल्लो
2017 विधानसभा वेंचणुके पयलीं भाजपाचे प्रा. लक्ष्मीकांत पार्सेकार मुख्यमंत्री आसतना मगोचे सुदिन ढवळीकार आनी दीपक ढवळीकार ह्या दोगांकूय मंत्रीमंडळांतल्यान काडून उडयिल्ले. तशेंच 2019त शिरोडें मतदारसंघांतल्यान मगोचे दीपक ढवळीकार हांणी वेंचणूक लडोवपाचो निर्णय घेतले उपरांत सुदिन ढवळीकार हांकां काडून उडयिल्ले. ह्या वेळार डॉ. प्रमोद सावंत मुख्यमंत्री आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
