भांगरभूंय | प्रतिनिधी
काँग्रेस, गोवा फॉरवर्डाची राज्यंपालां कडेन मागणी
पणजी: फोंडें पोटवेंचणुकेची आचारसंहिता लागू जाल्ल्यान मदींच तहकूब केल्लें विधानसभा अधिवेशन आतां परतून आपोवचें, अशी मागणी काँग्रेस विधीमंडळ फुडारी युरी आलेमांव आनी गोवा फॉरवर्डाचे आमदार विजय सरदेसाय हांणी केल्या. दोगांनी राज्यपाल पुसापती अशोक गजपती राजू हांकां स्वतंत्रपणान पत्र बरयलां. उरिल्लें कामकाज पुराय करपाची संद सरकाराक लेगीत मेळटली, अशें पत्रांत म्हणलां.
विधानसभेचें अर्थसंकल्पी अधिवेशन 6 मार्चाक सुरू जालें. अधिवेशनाच्या पयल्याच दिसा मुख्यमंत्री डॉ. प्रमोद सावंत हांणी 2026- 27 वर्साचो अर्थसंकल्प सादर केलो. फोंडें पोटवेंचणुकेची अधिसुचोवणी 15 मार्चाक जारी जाली. आचारसंहिता जारी जाल्ल्यान मागण्यांचेर चर्चा सुरू आसतना 16 मार्चाक अधिवेशन सिने डाय तहकूब केलें. अर्थसंकल्पा सयत सरकारान विनियोग विधेयक संमत केलें.
अधिवेशना पयलीं नगर नियोजन कायद्याचें कलम 39 ए रद्द करपाची तजवीज आशिल्लें गोंय जमीन जतनाय विधेयकाचो मसुदो आदले न्यायाधीश फेर्दीन रिबेलो हांणी राजकी पक्षांक सादर केल्लो. हें विधेयक मांडपा खातीरची नोटीस विरोधी आमदारांनी दिल्ली. अधिवेशन मुजती पयलीं तहकूब जाल्ल्यान ह्या विधेयकाचेर चर्चा जाली ना. शेत जमीन सुरक्षीत दवरपा सयत गोंय सांबाळून दवरपा खातीर हें म्हत्वाचें विधेयक आसा. हाचेर चर्चा जावपा खातीर राज्यपालांनी परतून अधिवेशनाचे समन्स जारी करचे, अशी मागणी विजय सरदेसाय हांणी केल्या.
पोटवेंचणुकेची आचारसंहिता जारी जाले उपरांत लेगीत हेर राज्यांनी अधिवेशनां सुरू आशिल्लीं. गोंयांत मात आचारसंहितेचें कारण दिवन अधिवेशन मुजती पयलींच तहकूब केलें. लोकांचे प्रस्न मांडपा सयत म्हत्वाच्या विधेयकांचेर चर्चा करपा खातीर लोक आमदारांक वेंचून दितात. गोंया खातीर म्हत्वाच्या विधेयकांचेर चर्चा जावपा खातीर अधिवेशन जावपाची गरज आसा. परतून अधिवेशनाचे समन्स जारी करचे, अशी मागणी काँग्रेस विधीमंडळ फुडारी युरी आलेमांव हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
