पोक्सो कायदो आनी बदल

भांगरभूंय | प्रतिनिधी

पोक्सो हो एक खाशेलो कायदो. भुरग्यांचेर जावपी गुन्यांवांची संख्या उणी करपा हेतान केल्लो. ताका लागून खर ख्यास्त दिवप हाचो तातूंत आस्पाव आसा.

भारतांत एक विशिश्ट कायदो म्हूण पोक्सो कायदो 2012 वर्सा लागू जालो. 18 वर्सां सकयल्या भुरग्यांचेर जावपी लिंगीक
अत्याचारांची संख्या वाडत आशिल्ल्यान हो कायदो सामकाे गरजेचो आशिल्लो.
2018 वर्सा कठुआ हांगासरल्या सान पिरायेचे चलयेचेर बलात्कार प्रकरणान पुराय देशाक हालोवन उडयिल्लो. एका सान पिरायेचे चलयेचेर एका देवळांत बलात्कार करपाची ही घडणूक. देवळाक भेट दिवपी लोकांच्या मता प्रमाण खंयचेय चलयेक दीसभर थंय दवरला वा थंय कोण आसा हाचो दुबाव लेगीत नाशिल्लो. ही घडणूक चली भुरगें आशिल्ल्या पालकां मदीं आनी कुटुंबां मदीं भंय निर्माण करपी आशिल्ली. आयज लेगीत देशांत दर दिसा सान पिरायेच्या भुरग्यांचेर बलात्कार केल्ल्या आरोप्यां आड शंबरां परस चड केशी नोंद जातात. तातूंत पोक्सो कायदो आनी भारतीय दंड संहितेच्या संबंदीत कलमा सयत आरोप नोंद आसतात. गोंयांत लेगीत आमकां दिसाळ्यांचेर वा टीव्ही चॅनलाचेर अशा घडणुकां विशीं वाचपाक, पळोवपाक मेळटाच.
पूण केन्ना – केन्ना प्रकरणाच्या तथ्यांत वचून अधिकाऱ्यांनी अटक केल्ले आरोपी व्यक्ती लेगीत निरपराधी आसपाचीय शक्यताय आसूं येता अशें तुमकां दिसना? सान पिरायेच्या भुरग्यां मदीं वाडपी संबंदाक लागून काय वेळार हीं भुरगीं आवय-बापायचा दोळ्यां आड एकामेकां कडेन लिंगीक संबंद दवरतात अशेय प्रसंग आसात.
आयज तंत्रज्ञान इतलें मुखार पावलां की एका बोटार संवसारांतल्या खंयच्याय कोनशाक कितें चल्लां हें जाणून घेवप सोंपें जालां. कांय भुरग्यांक सामके ल्हान पिरायेचेर जोडिदार आसप, वांगडा भोंवप आनी कायद्यान मान्यताय मेळिल्ल्या नात्यांत आसतना व्हडलो मनीस करता तें सगलें करपाची उमळशीक तांकां लागता. भुरगीं वयांत आयलीं की तांकां योग्य ते मार्गदर्शन करप, तांचे कडेन उलोवप, तांची इश्टागत आशिल्ल्या भुरग्यां कडेन उलोवप ह्यो कांय गजाली व्हड अरिश्ट जिरोवंक शकतात, कारण 80 टक्के नोंद जाल्ल्या लिंगीक आरोपांनी अत्याचार जाल्ले आनी अत्याचार करपी खंय ना खंय एकमेकां बरोबर गांठायिल्ले आसताच.
14 जुलय 2023 दिसा सुनावणी करतना मुंबयच्या उच्च न्यायालयान भारतांत संमती दिवपाची पिराय जी अठरा वर्सां थारायल्या ती सोळा वर्सां मेरेन उणी करची अशे निर्देश दिल्यात, तशेंच सगल्यांत वरिश्ठ न्यायालयान लेगीत संमतीची पिराय उणी करपाचेर लक्ष केंद्रीत केलां. तशेंच संमती आसतना लिंगीक संबंद दवरून मागीर गुन्यांव नोंद केल्ल्यांक निरपराधी लेगीत थारायला. हें सत की चूक करतल्याक ख्यास्त हीं मेळपाकूच जाय, नाजाल्यार अशा गुन्यांवांचेर केन्नाच आळाबंद हाडूंक मेळचें ना. पूण प्रसंग जंय लिंगीक संलग्नतायेंत बळी पडटना आपूण करता ती कृती समजून घेवपाक सक्षम आशिल्ल्यांक, आनी समज नाशिल्ल्यांक, वेगळेवेगळे तरेन पळोवप लेगीत तितलेंच गरजेचें.
कांय वेळार मनशाची शारिरीक वर्सां आनी ताची मानसीक वाड हातूंत लेगीत जमीन आनी मळबा इतलें अंतर आसता, आनी ताचे कडेन आडनदर करची न्हय. पोक्सो हो एक खाशेलो कायदो. भुरग्यांचेर जावपी गुन्यांवांची संख्या उणी करपा हेतान केल्लो. ताका लागून खर ख्यास्त दिवप हाचो तातूंत आस्पाव आसा. पूण दर एका कलमा खाला दंड हो व्हड आशिल्ल्यान केन्ना-केन्ना संमतीन केल्ले क्रियेक लेगीत पालक मानून घेनात आनी केशी दाखलकरतात.
भारतांतलो फौजदारी कायदो सुदारणावादी स्वरुपाचो आसूं; मात निर्भया सामुहीक बलात्कार प्रकरणा सारकिल्ल्या घृणास्पद गुन्यांवाक फांशी असली खर ख्यास्त दिवपाक लेगीत फाटीं ना. असली ख्यास्त दिवप गरजेचीच. कारण ताका लागून गुन्यांव करतल्यांच्या मनांत भंय निर्माण जाता. 100 गुन्यांवकार मुक्त जावं, एका निरपराध्याक ख्यास्त जावंक फावना होवूय यत्न आमचो कायदो करता. पूण सद्या ह्या वेळार 2019 वर्सा केल्ले प्रमाण कायद्यांत परतून दुरुस्ती करपाचो विचार करपाक जाय अशें म्हाका दिसता. तशेंच संमती दिवपाची पिराय उणी करप तातूंत मानसीक पिरायेचो आस्पाव करप हें लेगीत आपणावप गरजेचें. कारण केन्ना केन्ना बळी वा आरोपी शारिरीक नदरेन व्हडलो दिसलो आनी आसलो तरीय मानसीक नदरेन सान आसूं येता. तसोच सान दिसल्यार पसून कमी पिरायेचेर लेगीत किते बरें आनी कितें वायट हेंवूय तोलपाक सक्षम आसता.
कायद्यांत समाज बदलता ते प्रमाण बदल हाडले की ते त्या कायद्याचे मूळ उद्देश राखून दवरपाक आदार दितात तशेंच ताचो कोण दुरुपेग करूंक पावनात.

अॅड. सायली शा. कवठणकार
8411982774