भांगरभूंय | प्रतिनिधी
भांगरभूंय । प्रतिनिधी
म्हापशेंः रानांतल्या रस्त्या खातीर ना हरकत दाखलो (एनओसी) दिवप हे पंचायतराज कायद्याचें उल्लंघन आसा. सरपंचाचे सयेन एनओसी दिवपाक मेळना. पंचायत सचिवाक तो अधिकार आसा, असो दावो करून आयतारा जाल्ले पोंबुर्फा-ओळावलीचे ग्रामसभेंत सरपंचाच्या राजिनाम्याची मागणी लोकांनी केली.
सरपंच लिओपोल्दिना फर्नांडीस ई नोरोन्हाचे येजमानके खाला जाल्ले ग्रामसभेंत जमनी पोंदच्यान वीज केबल्स घालपाचें काम, एफआरएफ सुविधा, कोयर वेवस्थापन, पोंबुर्फा वझऱ्याच्या वाठाराची जैवविविधताय दायज सुवात म्हणून जाहीर करप, जलतरण आनी बोरवेलीक मान्यताय, आनी खाजन शेतांत येवपी खारें उदक ह्या विशय़ांचेर चर्चा जाली.
एकोशी हांगा रान वाठारांतल्या रस्तो बांदकामा वयल्यान ग्रामसभेंत हाजीर आशिल्ल्या लोकांनी पंचायत मंडळाक धारेर धरलें. राना वाठारांतल्या ह्या कामाची म्हायती राना खात्याक दिल्ली काय ना अशे प्रस्न लोकांनी पंचायत मंडळाक विचारले. बांदकाम मोडून उडोवपाच्या आदेशाची कार्यवाही किद्याक केली ना हाची तांणी विचारणा केली. सरपंचाक अधिकार नासतना रस्त्या खातीर एनओसी कशी दिली अशें धीरेंद्र फडते हाणे विचारून सरपंचाच्या राजिनाम्याची मागणी केली. हेर ग्रामस्थांनी ताका तेंको दिलो. मात आपूण राजिनामो दिवपाक सरपंचान न्हयकार दिलो.
पंचायत सचिवाक कळयनासतना सरपंचान एनओसी दिल्ले खातीर तांच्या राजिनाम्याची मागणी करपी थाराव एकमतान पास केलो. गांवांतल्या बोरवेल आनी जलतरण तलावाच्या समस्ये विशीं समित सरदेसाय हाणे प्रस्ताव मांडलो. गांवांत ताचें काम करपाक दिवचें न्हय अशी मागणी केली. ते संबंदीचो थाराव उदकास्रोत खाते आनी नगर नियोजन खात्याक धाडपाचें थारलें. पोंबुर्फा वझ्ऱ्याची सुवात जैवविविधताय थळ म्हणून जाहीर करपाची मागणी करपी थाराव एका ग्रामस्थान मांडलो. तो पास केलो.
पंचायत वाठारांत जमनी पोंदच्यान वीज केबल्स घालपा खातीर एचडीटी मशिनाचो उपेग करून रस्ते उण्या प्रमाणांत खणपाची वेवस्था करपाची सूचोवणी गॅमलीन फर्नांडीस हाणे केली. पंचायत मंडळान ते खातीर आमदार आनी वीज खात्याक पत्र बरोवपाक ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
