भांगरभूंय | प्रतिनिधी
म्हापशें: खोर्जुंवें- हळदोणेंच्या दोन म्हत्वाच्या आनी अत्याधुनीक तंत्रज्ञानाच्या आदारान बांदिल्ल्या पुलांची सध्या देखरेख नाशिल्ल्यान आवतिकाय जाल्या. खोर्जुवें आनी पैरा हे दोनूय पूल खोर्जुंवें गांवाक (जुवें) जोडटात. हे पूल पर्यटकांचें आकर्शणाचें केंद्र. 15 वर्सां आदीं बांदिल्ल्या ह्या पुलांचे देखरेखी कडेन सरकारान आडनदर केल्ल्यान तांची आवतिकाय जाल्या.
पैरा हो ओपनींग ब्रीज बील उत्कृश्ट तंत्रज्ञानाच्या आदारान बांदिल्लो. ह्या पुला खातीर 14 फेब्रुवारी 2004 ह्या दिसा बुन्यादी फातर बसयिल्लो आनी 19 डिसेंबर 2007 ह्या दिसा ताचें उक्तावण जाल्लें. भारतांत अशे तरेचो पूल फक्त कोलकाता आनी खोर्जुव्यां आसा. न्हंयेंतल्यान बार्जींक सोंपेपणी येरादारी करपाक मेळची हे खातीर हो हॉरिझोंटल उक्तो जावपी पूल बांदिल्लो. पूण पुलाचया उक्तावणा उपरांत हो पूल केन्नाच उक्तो जावंक ना.
ह्या पुलाच्यो खूबश्यो वस्तू सध्या कळमल्यात. हो पूल उक्तो जावचो हे खातीर खास दोन जनरेटरांची वेवस्था केल्ली. सध्या तांची वायट स्थिती जाल्या. जनरेटर दवरिल्ली शेड लेगीत पेड्डेर जाल्या. ताका लागून हे जनरेटर चोरयेक वचपाची शक्यताय निर्माण जाल्या. ह्या पुलाच्यो गरजेच्यो वस्तू लेगीत गायब जाल्यात.
हळदोणें गांव आनी खोर्जुंवें जुंव्याक जोडपी हो म्हत्वाचो पूल खोर्जुवेंचो केबल स्टेड पूल. ह्या पुला खातीर 30 मे 2003 ह्या दिसा बुन्यादी फातर बसयिल्लो जाल्यार 21 नोव्हेंबर 2004 ह्या दिसा ताचें उक्तावण जाल्लें. ह्या पुलाचे देखरेखी कडेन आनी दुरुस्ती कडेन सरकाराची आडनदर जाल्या. पुलाच्या खांब्यांक कळम आयल्या.
ह्या दोनूय पुलाय वयल्या लायटींचो आपालिपा चालू आसता. लायटीचे खांबेय कळमल्यात. विद्यूत रोशणाय आनी रंगकामाचो पत्तोच ना. हे दोनूय पूल पर्यटनाचे नदरेन म्हत्वाचे आसात, पूण सध्या तांची आवतिकाय जाल्या. मजगतीं, हालींच जाल्ले गुजरातांतले मोरबी पुलाचे दुर्घटणेक लागून खूबशा लोकांक जीव वगडावचो पडलो. ह्या केबल स्टेड पुलाचे देखरेखी कडेन आडनदर जाल्ल्यानूच ही दुर्घटणा घडली. ताका लागून गोंय सरकारान पैरा आनी खोर्जुवें सयत गोंयांतल्या पुलांची दुरुस्ती करून ते सांबाळचे. पैरा पूल 15 वर्सां आदीं फक्त उक्तावणे वेळारूच उक्तो जाल्लो. पुलाचें बेरींग घडये घट जावन ताका कळम आयल्या आसतली. सरकारान पैरा आनी खोर्जुवें ह्या दोनूय पुलांक परतून झळाळी दिवची, अशी मागणी थळाव्या लोकां वांगडाच अमीत आगरवाडेकार हांणी केल्या.
दुरुस्ती खातीर सरकाराक निवेदन दितलों: अॅड. फेरेरा
हळदोणें गांवांतल्या दोनूय पुलांचे स्थिती विशीं आपल्याक म्हायती मेळ्ळ्या. घडणुकेचे सुवातेचेर वचून आपूण पळोवणी करतलों आनी ते उपरांतूचत सरकाराक पुलांचे दुरुस्ती खातीर निवेदन दितलों. तशेंच फाटपुरवण करून हो विशय सुटावो करतलों. जर फाटपुरवण करून लेगीत हो विशय सुटना जाल्यार विधानसभेंत आवाज काडटलों, अशी म्हायती आमदार अॅड. कार्लुस फेरेरा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
