भांगरभूंय | प्रतिनिधी
आयज ईद ए मिलाद, प्रेषित मुहंमद हांची जयंती. ते निमतान लेख.
मुहंमद हो अल्लाचो निमणो पैगंबर. तांकां ताणें लोकां खातीर आपलो संदेश दिवपाक धाडिल्लो. तांचो जल्म मक्का शारांत जालो. तांच्या आवयचें नांव अमिना आनी बापायचें अब्दुल्ला. तांच्या बापायक जल्मा पयलीं मरण आयलें जाल्यार आवयक ते स वर्सांचे आसतना मरण आयिल्लें. उपरांत तांच्या आज्यान आनी काकान तांचो सांबाळ केलो. तरणेपणांत तांचो बरो वेव्हार पळोवन तांकां ‘अल अमीन’ ह्या नांवान उलो मारताले. हाचो अर्थ विश्वसनीय आसा. तांची बरी वागणूक पळोवन एक गिरेस्त वेवसायीक खदिजा हांणी तांचे वांगडा लग्न केलें आनी तांकां बरे तरेन तेंको दिलो.
प्रेशित मुहंमद चाळीस वर्सांचे जाले तेन्ना मक्केंतल्या गारे हिश हे गुहेंत तांचे कडेन एक देवदूत (जिबरील) आयलो. तांणी तांकां अल्लाचो संदेश दिलो. मुहंमद मक्काच्या लोकांक बऱ्यो गजाली शिकयताले. कांय लोकांक तांचें हें काम पटना जालें. तांणी तांकां त्रास दिवपाक सुरवात केली. ते ओग्गी सगल्यांचो त्रास सोसून पसून आपलें काम करताले. जेन्ना लोकांचे त्रास चडून जावपाक लागले (तांचो जीव पसून घेवपाचो यत्न जालो.) तेन्ना तांकां सोंसूंक जायना जालें. तांकां अल्लाचो संदेश आयलो आनी ते मदिना ह्या जाग्यार पावले. थंयूय तांणी बरें काम करपाचो उपदेश लोकांक दिलो.
तांणी लोकांक बरे मनीस जावपाक शिकयले. गरीब, दुबळ्यांक मदत करपाक शिकयली. संवसारांत शांतीकायेन रावपाक शिकयलें, एकमेकांचेर दया करपाक शिकयली. अशे तरेन जायतें उपदेश तांणी केले. सगल्या लोकांक मार्गदर्शन केलें.
ते 63 वर्सांचे आसले तेन्ना तांकां मरण आयलें. मरचे पयलीं तांणी सगल्यांक अल्लाचो संदेश दिलो आनी फुडें तो येवपी पिळग्यांक दिवपाक सांगलें.
आपलें जिवीत तांणी बरें मार्गदर्शन करपाक ओंपलें. आमी तांचे पसून बोध घेवन तांच्या मार्गा वयल्यान चलपाक जाय. तांणी सांगिल्ले प्रमाण अल्लाचो संदेश सगल्या पिळग्यां मेरेन पावोवन तांचो हेतू सफल करपाक जाय. ते फक्त मुसलमानूच न्हय, तर सगल्या धर्मांच्या लोकां खातीर वावुरले. तेच भशेन आमीय वावरूंक जाय. अशें केल्यारुच आमच्या जिविताचो हेतू पुराय जातलो.
– सफिना शाह
90494 44787
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
