भांगरभूंय | प्रतिनिधी
पावसाळ्यां आदीं मेळटली नव्या पुलाची सुविधा
भांगरभूंय। प्रतिनिधी
वाळपयः दोन वर्सां सावन आडकल्ल्या पैकूळ गुळेली पुलाचें काम निमाण्या पांवड्यार पावलां. पावसाळ्यां आदीं पैकूळच्या लोकांक नव्या पुलाची सुविधा मेळटली, अशी म्हायती मेळ्ळ्या.
दोन वर्सां आदीं पावसाळ्यांत पैकूळ पूल मोडिल्लो. लोकांक तात्पुरती सेवा म्हूण थंय पांयपूल बांदिल्लो. जाल्यार संपर्क रस्तो म्हूण धारबांदोडें वाठारांतल्यान वेवस्था केल्ली. तरी लेगीत पावसाळ्यांत पैकूळ वाठारांतल्या लोकांची वेगवेगळ्या कामा खातीर व्हड प्रमाणांत गोची जाताली. हे खातीर ह्या वाठाराचे आमदार विश्वजीत राणे हांणी खर यत्नान पुलाच्या प्रस्तावाक मंजुरी मेळयली. ते उपरांत रोखडेंच पुलाचें काम हातांत घेतिल्लें, पूण दोन वर्सां सावन ह्या कामाची गती सामकीच उणी जाल्ली.
मजगतीं, हे संबंदांत प्रतिक्रिया उक्तायतना समाज वावुरपी अजीत देसाय हांणी सांगलें, पावसाळ्या आदीं हो पूल जावप खूब गरजेचें आसा. हे संबंदांत ह्या वाठारांतल्या लोकांनी आमदाराची भेट घेवन हे संबंदांत आपली नाराजी उक्तायल्ली. तांच्या यत्नांक लागून आतां हो पूल पासाळ्या आदीं बांदून पुराय जातलो.
सरपंच नितेश गावडे हांणी सांगलें, हो पूल जाता तितले बेगीन पुराय जावचो हे खातीर आमदार विश्वजीत राणे हांणी यत्न केल्ले. मात खूबश्यो आडखळी येताल्यो. अखेर ह्या पुलाचें काम आतां निमाण्या पांवड्यार पावलां. पावसाळ्या आदीं तो लोकां खातीर उक्तो जातलो.
पंच संतोषी नायक हांणी सांगलें, आदलो पूल खूब पोरणो जाल्लो तसेंच खुबूच अशीर आशिल्लो. नवो पूल रूंद आसा. फुडारांत गांवाचे उदरगतींत हो पूल खुबूच म्हत्वाचो घटक थारतलो. पैकूळ गांवांत खूबश्यो समस्या आसात. सरकारान आतां त्यो सोडोवपाक प्राधान्य दिवचें, अशी तांणी मागणी केली. मजगतीं, गोंय सरकाराच्या मुळाव्या साधन सुविधा मंडळाचे वेवस्थापकीय संचालक हरीश अडकोणकार हांणी केल्ल्या विशेश यत्नांक थळाव्या लोकांनी तांचे उपकार मानल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
