भांगरभूंय | प्रतिनिधी
वाळपयः गुळेली पंचायत वाठारांतलो पैकूळचो पूल 2021 त कोसळ्ळो. ताका लागून पैकूळ आनी गुळली मदलो संपर्क तुटलो. थंय नवो पूल बांदचो, अशी मागणी थळाव्या लोकांनी केल्ली. पूल कोसळचे आदींच हे संबंदांतलो प्रस्ताव तयार केल्लो, मात पूल कोसळ्ळे उपरांत ह्या प्रस्तावाक गती मेळ्ळी. 2021त पूल कोसळ्ळे उपरांत ते संबंदांतल्या प्रस्तावाक सरकारान मंजुरी दिली आनी 13 कोटी रुपया खर्च करून थंय नवो पूल बांदतले अशी घोशणा भलायकी मंत्री विश्वजीत राणे हांणी केल्ली.
फाटल्या दोन वर्सां सावन त्या पुलाचें बांदकाम चालू आशिल्ले. रगाडा न्हंयेर हो पूल बांदतना खूबश्यो आडखळी आयिल्ल्यो. आतां ह्या पुलाचें काम निमाण्यां पांवड्यार पावलां. पावसाळ्या आदीं लोकांक हो नवो पूल मेळटलो. 18 एप्रीलाक ह्या पुलाचेर हॉटमिक्स डांबरीकरण करपाक सुरवात केल्या.
मजगतीं, हे संबंदांत भलायकी मंत्री तशेंच थळावे आमदार विश्वजीत राणे हांचे कडेन संपर्क केलो तेन्ना तांणी सांगलें, ह्या पुला खातीर आपणे आदीं सावन यत्न सुरू केल्ले. मात हो पूल कोसळ्ळे उपरांत त्या यत्नांक गती मेळ्ळ्या. आतां रोखडेंच ह्या पुलाचें उक्तावण करतले. पूल उक्तो जाले उपरांत पैकूळ गांवांत नव्या सुविधां खातीर मार्ग मेकळो जातलो. ह्या पुलाक लागून पैकूळ वाठारांतले उदरगतीक चालना मेळटली. पोरण्या पुला वयल्यान फक्त चार चाकी गाडयो व्हरपाक मेळटाल्यो, आतां अवजड येरादारी लेगीत करपाक मेळटली. तशेंच ह्या वाठारांतल्या धारबांदोड्यां वचपाचीय सुविधा मेळटली. ताका लागून हो गांव आतां उरगतीच्या प्रवाहांत येतलो, अशी प्रतिक्रिया राणे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
