भांगरभूंय | प्रतिनिधी
भांगरभूंय । प्रतिनिधी
काणकोणः पैंगीण, श्रीस्थळ, आगोंद आनी खोतीगांव ह्या चार पंचायतींत काणकोणचे आमदार आनी सभापती रमेश तवडकार हांच्या समर्थकांक सरपंच आनी उपसरपंच करपाचें निश्चीत जालां अशी खबर आसा. 22 ऑगस्टाक सरपंच आनी उपसरपंचाची निवड जातली. गांवडोंगरी पंचायतींत धिल्लन देसाय जाल्यार लोलयें-पोळें पंचायतींत प्रतिजा बांदेकार ही सरपंच जावपाची शक्यताय आसा. खोला पंचायतींत मात आदलो उपमुख्यमंत्री चंद्रकांत कवळेकार थाराययले तो पंच सरपंच जातलो.
सभापती तवडकार हांणी पैंगीण, आगोंद, खोतीगांव आनी श्रीस्थळ पंचायत वेंचणुकेंत जैतिवंत जाल्ल्या पंचांची बसका घेवन तांचे कडेन चर्चा केल्या. लोलयेंच्या कांय पंच वांगड्यां कडेन तांणी संपर्क सादला. लोलयें, पैंगीण आनी श्रीस्थळ ह्या पंचायतींतलें सरपंचपद बायलां खातीर राखीव आसा. आगोंद आनी खोला पंचायतींत उपसरपंचपद बायलां खातीर आरक्षीत आसा. 21 वॉर्ड बायलां खातीर राखीव दवोरिल्ले. प्रत्यक्षांत 23 बायलो पंच म्हणून वेचून आयल्यात. साबार उमेदवारां खातीरच्या वॉर्डांतल्यान लोलयेंतल्यान सुप्रिया सुरेंद्र पागी, पैंगीणच्यान उपसभापती तवडकार हांची घरकान्न सविता तवडकार, गांवडोंगरींतल्यान सलोनी गांवकार, खोलांतल्यान प्रज्ञा गौतम कामत आनी आगोंदांतल्यान फतिमा रॉड्रिग्ज वेंचून आयल्या.
लोलयें आनी गांवडोंगर ह्या पंचायतीनी जरी स्वतंत्र गट आसले तरी पंचायत वाठराचे उदरगती खातीर सरकाराचो तेंको जाय आशिल्ल्यान ह्या दोनूय पंचायतींतले पंच आमदार तवडकार आनी मुख्यमंत्री डॉ प्रमोद सावंत हांचो तेंको घेतले अशें दिसता. आगोंद पंचायतींतल्या बिनविरोध वेंचून आय़िल्ले धिल्लन देसाय हे 25 वर्सां उपरांत परत पंचायत राजकारणांत देंवल्यात. आपल्या समर्थक पंचांनी सरपंचपदा खातीर आपल्या नांवाची शिफरस केल्या अशें तांणी सांगलें. लोलयें-पोळें पंचायतींत पोळें वॉर्डांतल्यान वेंचून आय़िल्ली प्रतिजा बांदेकार आपल्या गटाची सरपंचपदाची उमेदवार आसतली अशी म्हायती अजय लोलयेंकार हांणी दिल्या.
पैंगीण पंचायतीच्या आमोणे ह्या सर्वसादारण वॉर्डांतल्यान जैतिवंत जाल्ली सविता तवडकार पैंगीणची सरपंच जातली. खोतीगांव पंचायतींत कृष्णा गांवकार जाल्यार बायलां खातीर राखीव आशिल्ल्या श्रीस्थळ पंचायतींत वैजावाडा वॉर्डांतल्यान वेंचून आय़िल्ली सेजल गांवकार हिचें सरपंच म्हणून नांव घेतात. खोला पंचायतींत सरपंचपदा खातीर पंढऱी प्रभुदेसाय, कृष्णा वेळीप आनी अजग पागी हाचे मदीं सर्त आसा. ते चंद्रकांत कवळेकार हांचे कडेन चर्चा करून तोडगो काडटले अशी खबर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
