भांगरभूंय | प्रतिनिधी
श्रमधाम येवजणेंतल्या घर बांदून दिवपाची सभापतीची हमी
भांगरभूंय । प्रतिनिधी
काणकोण : पैंगीण महालवाड्या वयली शोभा बी. पागी हिणें 2008 त इंदिरा आवास येवजणेंतल्यान घर बांदिल्लें. त्या घराचेर बुधवारा 21 मेक सकाळीं पणसाचें व्हड झाड पडिल्ल्यान तें मातये भरवण जालें.
हे घडणुकेची थळावे पंच तशेंच पैंगीणचे उपसरपंच सुनील पैंगीणकार, पंच सतीश पैंगीणकार हांकां म्हायती मेळटाच तांणी काणकोणचे आमदार तशेंच सभापती रमेश तवडकार हांकां हे संबंदांत म्हायती दिली. म्हायती मेळटाच रमेश तवडकार हांणी घडणुकेचे सुवातेक भेट दिली. निराधार बायलेक श्रमधाम येवजणेंतल्यान तें घर बांदून दितले, अशें सांगून तिका धीर दिलो.
काणकोण मामलेदार कार्यालयाचे अव्वल कारकून रोहिदास गांवकार, सर्कल इन्स्पेक्टर रमेश नायक, तलाठी श्रीपाद पागी, नरेंद्र अग्रासनी हांणी घडणुकेचे सुवातेर येवन घराचो पंचनामो केलो आनी सरकारा वतीन पांच हजार रुपयांची अर्थीक मजत शोभा पागी हिका दिली. उजो पालोवपी दळाच्या जवानांनी घराचेर पडिल्लें झाड कुशीक काडलें. मजगतीं, तळपणां घोग्यांनी पडिल्ल्या पावसाच्या उदकाक वाट मेळूंक नाशिल्ल्यान उल्हास मेत्री आनी हेरांच्या घरा कुशीक उदक सांचलें. जाल्यार खोतीगांव वाठारांत रस्त्याचेर पडिल्लें झाड थळाव्या लोकांनी कुशीक काडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
