भांगरभूंय | प्रतिनिधी
भांगरभूंय । प्रतिनिधी
काणकोणः काणकोण तालुक्यांतल्या पैंगीण गांवांतल्या श्री परशुराम देवळांत अंदू पयलेच फावट परशुराम जयंती व्हडा उमेदीन आनी भक्तिमय वातावरणात मनयली. परशुरामान आपल्या बाणान गोमंतभूंयची निर्मणी केल्ल्याची आख्यायिका आसा. हे भूंयेंत परशुरामाचें एकसुरें देवूळ पैंगीण गावांत आसा. मात थंय परशुराम जयंती व्हडा प्रमाणांत जायनाशिल्ली.
कांय हौशी तरणाट्यांनी एकठांय येवंन परशुराम जंयती उत्सव व्हडा प्रमाणांत मनोवपाचें थारायलें. ते खातीर परशुराम देवस्थान समिती तशंच गांवच्या लोकांनी प्रतिसाद दिल्ल्यान अदूं व्हो जयंती उत्सव मनयलो. हाचे फुडें व्हो उत्सव असोच मनोवपाचो तांचो हावेश आसा. देवस्थान समितीचो अध्यक्ष उदय प्रभुगांवकार आनी हेरांनी प्रतिसाद दिल्ल्यान उत्सवाक लोकांचो सामको बरो प्रतिसाद मेळ्ळो.
परशुरामाची भव्य रथयात्रा पैंगीण, माशें आनी लोलयें गांवांतल्यान काडली. सगले कडेन भाविकांनी रथयात्रेक येवकार दिलो. रथयात्रा परशुराम देवळांत आयले उपरांत परशुराम आनी पुरूस देवाची म्हापूजा आनी म्हाप्रसाद जालो. सभापती रमेश तवडकार आनी तांची घरकान्न पैंगीणची सरपंच सविता तवडकरान परशुरामाचं दर्शन घेतलें.
सांजे दीपा क्रिएशन्स वतीन सांस्कृतीक कार्यावळ जाली. तांतूत हिंदू जनजागृती समितीचे दक्षीण गोंय जिल्हो संयोजक सत्यविजय नायक हाणे परशुराम चरित्राचेर व्याख्यान दिलें. उपरांत गोंय सरकाराच्या म्हायती आनी प्रसिद्धी खात्याच्या सहकार्यान डॉ प्रवीण गांवकार, पल्लवी पाटील आनी वांगडी कलाकारांची परशुराम स्वर संध्या ही भक्ती गीतांची कार्यावळ जाली. श्री परशुराम पंचैग्राम समितीन परशुराम जंयती उत्सव आयोजना खातीर दिल्ल्या सहकार्या खातीर भाविकांनी खोस उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
