भांगरभूंय | प्रतिनिधी
डॉ. नूतन बिचोलकारः कागदी कपां आड म्हापश्यां जनजागृती
भांगरभूंय । प्रतिनिधी
म्हापशें: मायक्रो प्लास्टिकाचे बाबतीं जनजागृतीची गरज आसा. च्या सारक्या गरम पेया खातीर कागदी कपांचो वापर करप हें लोकांच्या भलायकी खातीर धोक्याचें आसा. हाचे आड लडो दिवपा खातीर पालिका सगळे तरेचो आदार करतली, अशें आस्वासन म्हापशेंची नगराध्यक्ष डॉ. नूतन बिचोलकार हांणी दिलें.
मायक्रो प्लास्टिका आड लडो दिवपाच्या उद्देशान म्हापशें नगरपालिकेन ज्ञानप्रसारक म्हाविद्यालय आनी म्हापशें लायन्स क्लब हांच्या जोडपालवान च्या आनी कॉफी सारक्या गरम पेयां खातीर कागदी कप वापरपा आड जनजागृती मोहीम चालीक लायल्या. मोहिमेक सुरवात करून दिले उपरांत नगराध्यक्ष डॉ. बिचोलकार उलयताली. ह्या वेळार उपनगराध्यक्ष सुसांत हरमलकार, डॉ. राजेश पेडणेंकार, म्हापशें लायन्स क्लबाचे अध्यक्ष श्रीधर नायक, प्राचार्य डॉ. दिलीप आरोलकार, डॉ. उमेश गांवस, डॉ. प्रभात देसाय आनी हेर मानेस्त हाजीर आशिल्ले.
डॉ. राजेश पेडणेंकार हांणी सांगलें, डॉ. सुधा योगल हांच्या आयआयटी अभ्यासा प्रमाण एके व्यक्तीन जर तीन कपां गरम च्या कागदी कपान पियेल्यार ती व्यक्ती सुमार 75 ल्हान मायक्रो प्लास्टीक कण खाता. मायक्रो प्लास्टीक खालें जाल्यार घातक वायट परिणाम जातात. कारण वापरिल्लीं रसायनां हीं कॉर्सिनोजेनिक, हार्मोनल असंतुळीत, आतड्यां संबंदांतल्यो समस्या आनी संबंदीत भलायकेच्यो समस्या आसात.
श्रीधर नायक हांणी सांगले, लुकसाण करपी सुक्ष्म प्लास्टीक पॉलिमराचें निर्मुलन ही काळाची गरज आसा. पुराय गोंयांत ही मोहीम चालीक लावचे खातीर लायन्स क्लब बांदील आसा. प्राचार्य डॉ. दिलीप आरोलकार हांणी सांगलें, भारतांतलीं कांक्राचीं वाडटी प्रकरणां ही हुस्क्याची गजाल आसा. शाश्वत उदरगती मजगतीं बरी भलायकी आनी कल्याण हांकां उर्बा दिवपाक जाय. ज्ञानप्रसारक म्हाविद्यालय दोन हजार विद्यार्थी आनी प्राध्यापकांच्या आदारान समाजाच्या समस्यां संबंदांत जनजागृताये खातीर विवीध हरीत उपक्रम चालीक लायतात, तातूंतलोच हो एक उपक्रम आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
