भांगरभूंय | प्रतिनिधी
म्हापशें : पेडे म्हापशें जंक्शना वयलो भुंयारी मार्ग तशेंच उड्डाण पुलाच्या प्रत्यक्ष बांदकाम कंत्राटदारान हातांत घेतलां. ह्या उड्डाण पुला खातीर 33.31 कोटी रुपया खर्च राष्ट्रीय म्हामार्ग प्राधिकरणा कडल्यान करतले. जंक्शना वयली येरादारी कोंयडी आनी रस्तो सुरक्षा सुदरावचे खातीर हो पूल म्हत्वाचो दुवो थारतलो.
राष्ट्रीय म्हामार्ग 66 रुंदीकरणा पसून पेडे म्हापशें ह्या जंक्शनाचेर उड्डाण पूल उबारपाची मागणी थळाव्या लोकांनी लावन धरिल्ली. सुरवातीक म्हामार्ग प्राधिकरणान हे सुवातेर उड्डाण पूल बांदपाचें नियोजन केल्लें, पूण उपरांत म्हामार्ग रुंदीकरण आराखड्यांतल्यान हे पूल वगळिल्ले.
म्हामार्ग रुंदीकरण जायत सावन हे जंक्शन घातक तशेंच अपघाताची सुवात जाल्ली. ह्या जंक्शनाचेर दर दिसा आड गाडयांचे अपघात जाताले. ताका लागून गोंय सरकारान हे सुवातेर भुंयारी मार्ग (उड्डाण पूल) बांदपाचो निर्णय घेतिल्लो. हे खातीर थळावे आमदार अॅड. कार्लुस फेरेरा, नगरसेवक विकास आरोलकार हांचे सयत थळाव्या लोकांनी फाटपुरवण केल्ली. ते उपरांत मे 2025 त ह्या पुला खातीर केंद्रीय रस्तो येरादारी मंत्रालया वतीन निविदा काडिल्ली. ते उपरांत बोलीदार कंत्राटदाराक 33.31 कोटी रुपयांचें हें काम दिल्लें. सुमार 200 मिटरांचो हो उड्डाण पूल आसतलो.
ह्या उड्डाण पुलाच्या बांदकामा खातीर जंक्शनाच्या दोनीय वटांतली म्हामार्गा वयली येरादारी म्हापशें येरादारी पुलिसांनी सर्वीस रोडाचेर घुंवडायल्या. ताका लागून गाडयांची संख्या वाडिल्ल्यान अपघात टाळचे खातीर सर्वीस रोडा वयली येरादारी एकेरी करपाची गरज आसा. पेडे, आकय, कामरखाजन, करासवाडो ह्या म्हापशें शारांतल्या लोकां सयत पेडणे ते वाळपय आनी आंतरराज्य प्रवाश्यां वांगडाच पेडे खेळां संकुलाचो लाव घेवपी खेळगड्यां खातीर लेगीत हें जंक्शन घातक जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
