भांगरभूंय | प्रतिनिधी
उदकाचे पायपलायनीचो व्हॉल्व धील केल्ल्यान व्हाळ
भांगरभूंय । प्रतिनिधी
म्हापशें: बिल्वान पेडें म्हापश्यां राष्ट्रीय म्हामार्गा लागसार मुख्य उदकाचे पायपलायनीच्या धील केल्ल्या व्हॉल्वांतल्यान व्हड प्रमाणार उदक व्हांवलें. ताका लागून त्या वाठारांत हुंवारा वरीं स्थिती निर्माण जाली. पायपलायनींतल्या उदकान राष्ट्रीय म्हामार्ग बुडिल्ल्यान येरादारीक आडखळ जाली. रातीं उसरां उदकास्रोत खात्या वतीन हो व्हॉल्व बंद केलो.
ही घडणूक आयतारा सांजेच्या 5 वरांच्या सुमाराक घडली. ही पायपलायन पर्वरी उदक शुद्धीकरण प्रकल्पाक जोडल्या. बिल्वान पेडेचे बाबू पॅलेस बार अॅण्ड रेस्टॉरंण्ट लागसारच्या उषा आब्रियो हांच्या घरा कुशीचे हे पायपलायनीचो व्हॉल्व धील केल्लो. कोणेतरी तो आनीक धील केलो. ताका लागून पायपलायनींतल्यान व्हड प्रमाणांत उदक व्हांवपाक लागिल्ल्यान ह्या वाठारांत हुंवारा वरीं स्थिती निर्माण जाली. कांय वेळान ह्या उदकाक लागून राष्ट्रीय म्हामार्गाची पेडे वटेन वचपी लेन पुराय बुडली आनी ताचे वयल्यान प्रवास करपी गाडयांक आडखळ जाली. कांय जाणांच्यो दुचाकी ह्या उदकांत बंद पडल्यो.
घडणुकेची म्हायती मेळटाच थळावे नगरसेवक विकास आरोलकार हांणी घडणुकेचे सुवातेर वचून पळोवणी केली. तशेंच उदका पुरवण विभागाच्या अधिकाऱ्यांक खबर कळटाच येवन पळोवणी केली. त्या वेळार ही पायपलायन उदकास्रोत खात्याची आशिल्ल्याचें लक्षांत आयलें. ते उपरांत उदकास्रोत खात्याच्या अधिकाऱ्यांनी घडणुकेचे सुवातेर येवन राती सुमार 9.30 वरांचेर येवन हो व्हॉल्व बंद केलो.
तिळारी कानालाक जोडिल्ले पायपलायनीचो व्हॉल्व पेडें, म्हापश्यां धील करून दवरिल्लो. कारण हे पायपलायनींतल्यान व्हड प्रमाणांत उदक येता. तो व्हॉल्व कोणेतरी आनीक धील केल्ल्यान ही स्थिती निर्माण जाल्ली. खबर कळटाच आमी रोखडोच तो व्हॉल्व बंद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
