भांगरभूंय | प्रतिनिधी
भांगरभूंय । प्रतिनिधी
काणकोणः आगोंदा बॉयजांक पेनल्टीचेर 5-3 अश्या गोलांनी हारोवन पेडें बॉयजान काणकोण तालुको पांवड्या वयली आंगोद पंचायत फुटबॉल सर्तीचें वस्तादपण मेळयलें. निमयीत खेळांत दोनूय पंगड गोल करपाक शकनाशिल्ल्यान पेनल्टींचेर मॅचीचो निकाल लावचो पडलो.
पेडें बॉयजाच्या रेन्चर डिसोझान पयल्या पेनल्टीचेर गोल केलो. आगोंदा बॉयजाच्या पिलम फर्नांडीसानची पेनल्डी पेडेंचो गोलकीपर आनी कॅप्टन काजय डिसिल्वान आडयली. पेड्या खातीर रोनाल्ड ऑलिव्हेरा, बॅरोन फर्नाडीस, अलरीच बार्रेटो आनी मॅरोन फर्नांडीस हांणी पेनल्टीचेर गोल केले. आगोंदा खातीर शायन, प्रितेश आनी रोमारियो हांगाक गोल करप शक्य जालें आनी तांका 3 आड 5 अशा गोलांनी हार खावची पडली.
आगोंदाच्या रोसमन फर्नाडीसाक सर्तींतलो उत्कृश्ट खेळगडो म्हणून जाल्यार पेडेंचो गोलकीपर डिसिल्वा उत्कृश्ट गोलकीपर थारलो. पेडें बॉयजांक आंगोंद पंचायत करंड आनी 40 हजार रुपयांचे रोख इनाम फावो जाले. उपजैतिवंत आगोंद बॉयजांक करंड आनी रोख 30 हजार रुपये दिले. आदलो खासदार नरेंद्र सावयकार इनाम भेटवण कार्यावळीक मुखेल सोयरो म्हणून हाजीर आशिल्लो. पाळोळें बॉयज आनी काणकोण अंडर 17 पंगडाक सेमी फायनलींत हार खावची पडली. तांका हरोवन आंगोद आनी पेडे पंगडांनी फायनलींत प्रवेश केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
