भांगरभूंय | प्रतिनिधी
म्हापशें: गोंयांत 26 ऑक्टोबर ते 9 नोव्हेंबर मजगतीं 37 वी राष्ट्रीय खेळां सर्त आयोजीत केल्या. हे सर्ती खातीर पेडें, म्हापश्यां भाऊसायब बांदोडकार खेळां संकुलाचें सरकारा वतीन गतीन नुतनीकरणाचें काम सुरू आसा. हें काम निमाण्या पांवड्यार पावलां.
ह्या खेळां संकुलांतलें मुखेल इनडोर आनी पेंवपा तळ्या इमारतीचें काम सद्या चालू आसा. जाल्यार बॅडमिंटन कोर्टाचें काम पुराय जावपाचे वाटेर आसा. ह्या मैदानार स्नूकर खेळ खेळयतले. हॉकी मैदाना वयल्या पाख्याचें काम सुरू आसा. इनडोरांतली सगली उजवाडा येवजण तशेंच एर कंडिशन सिस्टम नव्यान बसयल्या. बसकांचे वेवस्थेंत बदल केला. लांकडी फ्लोअरींग घालपाचें काम निमाण्या पांवड्यार आयलां.
मैदानाचे भायले वटेनचे जाळयेक तशेंच रंग मारपाचें काम निमाण्या पांवड्यार पावलां. सगली कडेन सीसीटीव्ही कॅमेरे आनी भितरले वटेन नव्यान रंगकाम केलां. खेळां संकुलांतल्या सिंथेटीक अॅथलेटीक धांवपट्टीचें काम अजून पुराय जाल्लें ना. धांवपट्टी खातीर लागपी सामान हाडून दवरलां.
खेळां मंत्री गोविंद गावडे हांणी खेळां संकुलाक फाटल्या 15 सप्टेंबर दिसा भेट दिवन नुतनीकरणाच्या कामाचो नियाळ घेतिल्लो. हें काम 30 सप्टेंबर मेरेन पुराय जावपाची आस्त तांणी उक्तायिल्ली. पूण अजून काम पुराय जाल्लें ना. ही सर्त आठ दिसांचेर येवन पावल्या. ताचे पयलीं खेळां संकूल तयार दवरपा खातीर कंत्राटदार कामगार यत्न करीत आसात.
पेडें खेळां संकुलांतल्या भोवउद्देशीय इनडोर हॉलांत 23 ऑक्टोबर ते 28 ऑक्टोबर मेरेन जिम्नॅस्टिक्स प्रकार जातले. 1 ते 8 नोव्हेंबर मेरेन बॉक्सींग, जाल्यार 27 ते 30 ऑक्टोबर मेरेन बिडियर्ड्स अॅण्ड स्नूकर चलतले. जाल्यार 30 ऑक्टोबर ते 8 नोव्हेंबर मेरेन हॉकीच्यो मॅची जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
