भांगरभूंय | प्रतिनिधी
पेडणें: पेडण्यां सरकारी संकुलांत दुसऱ्या माळ्यार आशिल्ल्या बायलां आनी भुरगीं उदरगत कचेरेच्या इमारतीची स्थिती घातक जाल्या. काल (सोमारा) दनपारच्या सुमाराक कचेऱ्याच्या पाख्याचो कांय भाग अचकीत कोसळ्ळो. हे घडणुकेंत अव्वल कारकून सुजय गावडे जखमी जालो. ताचेर उपचार सुरू आसात.
घडणुकेची म्हायती मेळटकच थळावे आमदार प्रवीण अर्लेकार हांणी घडणूक थळाक भेट दिवन इमारतीच्या परिस्थितीची पळोवणी केली. ह्या वेळार पेडणें म्हाल उपजिल्होधिकारी शिवप्रसाद नायक हांणीय घडणूक थळार हाजीर रावन घडणुकेची गंभीर दखल घेतल्या.
उपजिल्होधिकारी शिवप्रसाद नायक हांणी सांगलें, हाचे पयलींच ही इमारत घातक आशिल्ल्याची म्हायती इमारत बांदकाम विभागाच्या सहाय्यक अभियंत्याक कळयिल्लें. पूण ताचे कडेन गंभीरतायेन लक्ष दिवंक नाशिल्ल्यान हो प्रसंग घडलो. फुडारांत अश्यो घडणुको परतून घडच्यो न्हय हे खातीर ताकतिकेन उपाय येवजण करपाची गरज आशिल्ल्याचें मतूय तांणी उक्तायलें.
2022 सावन खूबशे फावटी संबंदीत इमारत घातक आशिल्ल्याचो पत्र वेव्हार करून लेगीत इमारत बांदकाम खात्याक जाग आयली ना. ताका लागून नागरिकांनी आनी कर्मचाऱ्यांनी खर निरशेणी उक्तायल्या.
मजगतीं, जखमी कारकून सुजय गावडे हाका तुयें हॉस्पिटलांत दाखल केला. थंय ताचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
