भांगरभूंय | प्रतिनिधी
पेडणें: मॉन्सुनपूर्व पावसाक लागून शेतकारांचें व्हड प्रमाणांत लुकसाण जालां. तेच प्रमाण मुखार पडपी पावसाक लागून शेत करपी शेतकारां मदीं मात्शी खोशी निर्माण जाल्ल्याचें चित्र दिसून येता.
हरशीं पावस जूनांत पडटा. जून म्हयन्यांत पावस पडले उपरांत शेतकारांच्यो जमनी घट्ट आसतात. ताका लागून नांगरणीचें काम करतना अडचणी येत आसतात. आतां मॉन्सुनपूर्व पावसान व्हड प्रमाणांत पावस पडत आशिल्ल्यान शेतां मोव जाल्यात. ताका लागून जून म्हयन्यांत शेताची नांगरण करतना कसलीच अडचण येवची ना, हे खातीर शेतकार खोशी उक्तायतात.
मजगतीं, वायंगण शेतां अंदूं उसरां पिकिल्ल्यान कांय जाणांनी तीं कापून उपरांत मळणी करपा खातीर दवरिल्लीं, त्या शेतकारांक मात व्हड प्रमाणांत लुकसाण सोंसचें पडलां.
कोरगांवचे शेतकार उदय प्रभुदेसाय हांणी प्रतिक्रिया दितना सांगलें, अंदूं आडवेळो पावस व्हड प्रमाणांत पडिल्ल्यान ताचो फायदो शेतकारांक जे पावसाच्या दिसांनी शेत करपी आसात तांकां जातलो. शेतांची नांगरण करतना अंदूं शेतांतली माती मोव जाल्ल्यान नांगरणी करतना सोंपें जातलें. पूण कांय शेतकारांक लुकसाण सोंसचें पडटलें. तशेंच कांय जाणांचे आंबे, काजू हीं पिकां आशिल्लीं. तांकांय लुकसाण सोंसचें पडटलें अशें मत तांणी उक्तायलें.
पेडणेंचे कृशी अधिकारी धिरज परब हांणी म्हणलें, आडवेळ्या पावसाक लागून ज्या शेतकारांचीं वायंगण शेतां उसरां पिकल्यांत तांकां व्हड प्रमाणांत लुकसाण जालां. कांय शेतकारांच्या झाडांक आंबे आसात. सेगीत पडत आशिल्ल्या पावसाक लागून आंब्यांक कीड लागता. ताका लागून शेतकारांक लुकसाण जावंक शकता.
आडवेळ्या पावसाक लागून तांबोसे पेडणेंचे शेतकार पांडुरंग आसोलकार, दिलीप सामंत, रवींद्र गवंडी, दयानंद गवंडी, हरीश पाटील आनी हेर शेतकारांचें व्हड प्रमाणांत लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
