भांगरभूंय | प्रतिनिधी
पेडणें: विदेशी पर्यटकांक चड करून एकेच सुवातेर आपलो भारत देश कसो आसा हाचें दर्शन दर्शन आनी भारतीय संस्कृती वांगडा जेवण एकेच सुवातेर मेळोवन दिवपी मिनी इंडिया प्रकल्प हो एक विशिश्ट थारतलो.
एक लाख वीस हजार चौरस मीटर सुवातेचेर मिनी इंडिया प्रकल्प उबारतात. ताका गोंय गुंतवणूक विभागा कडल्यान परवानो मेळ्ळा. हाका सरकाराची मान्यताय आशिल्ल्यान भारतीय संस्कृतीचें दर्शन, तेच सुवातेर फोक डान्स, विवीध मिरवणुकीं वांगडाच मनरिजवणेचीं साधनां, गोञयचे नामनेचे उत्सव, भारतांतल्या विंगड विंगड राज्यांचें जे फोक डान्स आसतले, ज्यो कला आसतल्यो ताचें दर्शन ह्या मिनी इंडिया प्रकल्पांत उपलब्ध जातलें.
पेडण्यां एक भोवउद्देशी, पर्यटकांक उर्बा दिवपा खातीर मिनी इंडिया प्रकल्प थीम पार्क नवो आकार घेतिल्ल्याचें चित्र दिसून येता. हो प्रकल्प सुरू जाले उपरांत ह्या वाठारांत हजारांनी पर्यटक येतले. भारत देशांत विवीध पर्यटक थळां वांगडा संवसारांतल्या अजापा मदलीं कांय अजापां आमच्या देशांत आसात आनी हीं थळां पळोवपा खातीर विवीध थळांचेर पर्यटक वचतूच आसतात. दिल्लीच्या कुतुबमिनार, आग्राचें ताजमहल, वृंदावनचें श्रीकृष्ण मंदीर, मुर्डेश्वरचें श्री महादेव मंदिर वाठार, गुजरातचें ल पोलादी पुरुष सरदार वल्लभभाई पटेल, दिल्लीचो लाल किल्लो, देशांतलीं जीं पर्यटन थळां आसात, इतिहासीक वास्तू आसात, त्या वास्तुंचें दर्शन एकेच सुवातेर जातलें. मिनी इंडिया थीम पार्क प्रकल्प हो पेडणें पालिका वाठारांतल्या दोंगरार, जंय भूतनाथ देव वाठार आनी पेडणें पालिकेचो इंधन प्रकल्प आसा ताचे मजगतीं हो मिने इंडिया प्रकल्प आकार घेतिल्ल्याचें पळोवपाक मेळटा.
ह्या प्रकल्पाचें काम सध्या झुजा पांवड्यार सुरू आसा. कांय प्रमाणांत झाडां मोडलीं. ते सुवातेर नवीं झाडा लावपाकूय ह्या वाठारांत तशी सुवात दवरल्या.
ह्या प्रकल्पांतल्यो ज्यो इतिहासीक वास्त उबारतात, तांकां पावसांत म्हणा बदलपी वातावरणांत कसलोच फरक पडचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
