भांगरभूंय | प्रतिनिधी
पेडणें: पेडणें म्हालांतल्या डोंगरा वयल्या माळरानाक आनी बागायतींक उजो लागपाच्या घडणुकांनी वाड जाल्या. तो उजो पालोवपा खातीर उजो पालोवपी दळाच्या जवानांक धांवपळ करची पडटा. कांय कडेन मुद्दाम उजो घालतात, जाका लागून माळराना वयल्या सुक्या तणाक लागिल्ल्या उज्यांत काजू बागायतींतलीं झाडां करपतात. तीं झाडां नश्ट करून नापीक दोंगर तयार करपाचो हो प्रकार चल्ला. व्हड प्रमाणार हे जमनीर दिल्लीच्या वेवसायिकांची नदर आशिल्ल्यान, अशें प्रकार चलिल्ल्याचो दुबाव आसा.
25 मार्चाक सांजेच्या 4,15 वरांच्या सुमाराक दाडाचीवाडी धारगळेच्या स्मिता पालयेंकार हे चलयेन पेडणें उजो पालोवपी दळाक फोना वयल्यान घारगळेच्या पाळयेवाड्या वयल्या सरकारी म्हाविद्यालया कडेन काजू बागायतीक उजो लागिल्ल्याची म्हायती दिली. सुलक्षा पालयेंकार हांचे काजू बागायतीक उजो लागून तांचें सुमार 20 ते 30 हजारांचें लुकसाण जालें. पेडणें उजो पालोवपी दळाच्या जवानांनी हवालदार डॉम्नीक मार्टीन हांच्या फुडारपणा खाला शैलेश हळदणकार, सहदेव परब, बया वरक आनी विराज किनळेकार हांणी उजो पालयलो आनी तांचें सुमार 50 हजारांचें लुकसाण जावपा पासून वाटायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
