भांगरभूंय | प्रतिनिधी
आंतरराष्ट्रीय कलाकारा वांगडा थळाव्या कलाकारांच्यो रंगतल्यो मैफली
भांगरभूंय । प्रतिनिधी
पेडणें: तांबोशें पेडणेंचे श्रीगुरुकृपा संगीत संस्थेचो 9 वो संगीत सुवाळो आयतारा 24 नोव्हेंबराक भेंडाळे वझरी पेडणेंच्या नानाशेठ सभाघरांत आयोजीत केला. ही म्हायती संस्थेचे अध्यक्ष नारायण (नाना) आसोलकार हांणी तोरशेंच्या हॉटेलांत घेतिल्ले पत्रकार परिशदेंत दिली.
हो संगीत सुवाळो गोंय सरकाराच्या कला आनी सांस्कृतीक संचालयनालयाच्या पालवान आयोजीत केला. ह्या सुवाळ्यांत उस्ताद यसीम खाम, पं. तुळशीदास नावेलकार, उस्ताद सरवार हुरेन, विश्वजीत मेस्त्री ह्या आंतरराष्ट्रीय नामनेच्या कलाकारां वांगडाच नवे गायक प्रकाश शिंदे, रेश्मा शेट्ये, तशेंच गोंयचे कलाकार अर्जून नायक, संकेत खलप, गौतम परब, गोविंद नायक आपली कला सादर करतले, अशें आसोलकार हांणी सांगलें.
संस्थेचे सचीव प्रदीप हळर्णकार हांणी सुवाळ्याची पुराय कार्यावळ जाहीर केली. ते प्रमाण आयतारा 24 नोव्हेंबराक दनपारां 3 वरांचेर श्रीगुरुकृपा संगीत संस्था निर्मीत नाट्यधारा ही कार्यावळ जातली. तातूंत रेश्मा शेट्ये आनी प्रकाश शिंदे हे कलाकार नाट्यगिता सादर करतले. तांकां तबल्याचेर बबन आरोंदेकार, हार्मोनियमाचेर मयूर महाले जाल्यार ऑर्गनाचेर विद्याधर नायक संगीतसाथ करतले. ते उपरांत अर्जून नायक हांचें शास्त्रीय आनी उपशास्त्रीय गायन जातलें. तांकां तबल्याचेर गौतम परब आनी हार्मोनियमाचेर विद्याधर नायक संगीतसाथ करतले. ते उपरांत संकेत खलब हांचें तबला वादन जातलें.
सांजेच्या 5.30 वरांचेर सुवाळ्याचें विधीवत उक्तावण जातलें. सुवाळ्याक मुखेल सोयरे म्हूण कला आनी संस्कृती मंत्री गोविंद गावडे हाजीर रावतले. आमदार प्रवीण आर्लेकार सुवाळ्याचे अध्यक्ष जाल्यार विशेश सोयरे म्हूण कला आनी संस्कृती खात्याचे उपसंचालक मिलिंद माटे, ज्येश्ठ रंगकर्मी विलास (बाबा) परब आनी ज्येश्ठ संगीतकार दामोदर शेवडे हाजीर आसतले. तांचे वांगडा माचयेर खाशेल निमंत्रीत म्हूण तुळशीदास गांवस (सरपंच, चांदेल हसापूर), तुळशीदास परब (ज्येश्ठ तबला वादक), प्रभाकर मोटे (उद्देजक), प्रताप भेंडाळकार (आदले जिल्हो पंचायत वांगडी आनी आदले सरपंच), सुबोध महाले (सरपंच, तांबोशे, उगवे, मोपा), मदन कोले (ज्येश्ठ नागरीक), पांजुरंग भोजी (ज्येश्ठ नागरीक), संस्थेचे अध्यक्ष नाना आसोलकार हाजीर रावतले. हे कार्यावळींत मंत्री गावडे हांचे हस्तुकीं पं. तुळशीदास नावेलकार हांचो सत्कार जातलो. सांजेच्या 7 वरांचेर विश्वजीत मेस्त्री हांचें शास्त्रीय गायन जातलें. तांकां हार्मोनियमाचेर दत्तराज सुर्लकार जाल्यार तबल्याचेर गोविंद नायक साथसंगत करतले. रातच्या 8 वरांचेर उस्ताद यसीम खान हांचें शास्त्रीय गायन जातलें. तांकां सारंगीचेर उस्ताद सरवार हुसेन, तबल्याचेर पं. तुळशीदास नावेलकार जाल्यार हार्मोनियमाचेर दत्तराज सुर्लकार संगीतसाथ करतले, अशी म्हायती प्रदीप हळर्णकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
