भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुको शेतकरी सेवा सहकारी संस्थेंचो वावर फकत पेडणे तालुक्या पुरतो मर्यादित दवोरनास्तना तिका राज्य पावंड्या वयली संस्था करून सहकारी मळार ती एक अग्रेसर संस्था जावपाक जाय अशें मत मांद्रेचो आमदार जीत आरोलकार हाणे उक्तायलां. संस्थेच्या पार्सें हांगच्या नूतनीकरण केल्ल्या आपसेवा विभागाचे उक्तावण कार्यावळींत ते उलयताले.
कार्यावळीक मांद्रेचो आदलो आमदार दयानंद सोपटे, पार्सेंचो सरपंच अजय कळंगुटकार, पंच वांगडी कल्पेश नायक, सुनिता बुगडे देसाय, संस्थेचो अध्यक्ष संतोष मळीक, उपाध्यक्ष विठोबा बगळी, संचालक सुहास नायक, गजानन शेट कोरगांवकार, दयानंद मांद्रेकार, उदय मांद्रेकार, कॅम्प अर्बन सोसायटीचो चॅरमन रवींद्र राऊत, अमोल राऊत, गणपत कळंगुटकार हाजीर आशिल्ले.
पेडणे शेतकरी सहकारी संस्था ना फायदो ना लुकसाण अशे तरेन शेतकारांच्या हिता खातीर काम करता. संस्थेच्या संचालक मंडळान सरकाराच्या शेतकारां खातीरच्या येवजण्यो तांच्या घरा मेरेन पावोपाचें काम हातांत घेवचें. दरेका गांवात आपलो आपसेवा विभाग सुरू करून लोकांक बऱ्या दर्जाचो माल उपलब्द करून दिवचो अशी सूचोवणी आरोलकाराक केली. संस्था फाटल्या 44 वर्सां सावन कार्यरत आसा. संस्थेन तरेकवार कलमां वितरीत करून पर्यावरणाक जाय अशें वातावरण करपाक मजत करची अशी सूचोवणी दयानंद सोपटेन केली.
पार्श्यांत संस्थेचो आपसेवा विभाग परत सुरू केल्ले खातीर पार्शेंचो सरपंच अजय कळंगुटाकारान खोस उक्तायली.. संतोष मळीकान सुरवेक प्रास्तावीक केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
