भांगरभूंय | प्रतिनिधी
पणजीः मोरजी बिडीओ कार्यालयांत सचीव सचिनाक मारबडय करपी दिल्लीच्या दुबावितांक अटक केल्या. तांचे आड खर कारवाय जातली, अशें आश्वासन मुख्यमंत्री डॉ. प्रमोद सावंत हांणी दिलें.
सचीव सचिन धावस्कार हांकां पेडणे बीडीओ कार्यालयांत दिल्लींतल्या बापूय पुतान मारबडय केल्ल्याचो विशय सांत आंद्रेचे आमदार विरेश बोरकार हांणी सभाघरांत शुन्य प्रहरा वेळार मांडिल्लो.
ह्या दिल्लीकारांनी तांकां फक्त गाळी मारूंक ना. तांणी तांकां थापटायलो. तशेंच स्टिलाची बाटली ताचेर फोडली. हे घडणुकेंत सचिवाचो हात फ्रॅक्चर जालो. ताका मारबडय केले उपरांत दिल्लीकारांनी बीडीओची कचेरी लेगीत फोडली, अशें बोरकार हांणी सांगलें.
जे सरकारी अधिकारी आपलें कर्तव्य करतात तांचे मदीं हे घडणुकेक लागून भंय पातळ्ळा. हे घडणुके आड खर कारवाय करची आनी अश्यो घडणुको परत जावच्यो न्हय म्हूण सरकारी अधिकार्यांक दिल्लीकारां कडल्यान राखण दिवपा खातीर सरकार कसलीं पावलां उखलतलें हाचें स्पश्टीकरण मुख्यमंत्र्यान दिवचें, अशी मागणी बोरकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
