भांगरभूंय | प्रतिनिधी
लोकां मदीं भिरांतीचें वातावरण; रानां खात्याची आडनदर?
पेडणें: पेडणें म्हालांतल्या गांवांनी आनी रानां वाठारांनी सद्या बिबट्यांचो खवदळ सुरू आसा आनी कांय कडेन हे बिबटे सरळ गांवांत येवंक लागल्यात. एका काळार रानां पुरते मर्यादीत आशिल्लीं हीं जनावरां आतां लोकवस्ती कडेन येवंक लागल्यांत. हे फाटभुंयेर लोकां मदीं भिरांतीचें वातावरण निर्माण जालां. खूबशे कडेन रातींचाे वावर बंद जाला. शाळेंतलीं भुरगीं, शेतकार, बायलां आनी जाण्ट्यां लोकां मदीं चड भिरांत आसा. पूण रानां विभाग आनी थळावें प्रशासन हांचे हे घडणुके कडेन आडनदर जायत आशिल्ल्याचो आरोप थळाव्या लोकां कडल्यान जायत आसा.
पेडणें म्हालांतल्या मांद्रें, कोरगांव, हरमल, केरी, विर्नोडें आनी मोरजी ह्या वाठारांत फाटल्या कांय सप्तकां सावन बिबट्यांचें दर्शन वेळावेळार जाल्ल्याचें थळावे लोक सांगतात. कांय कडेन ह्या बिबट्यांनी गोरवांक खावन उडयल्यात जाल्यार कांय कडेन सुण्यांक खावन उडल्यात. खूबशे कडेन सुण्यांचेर हल्लो केल्ल्याच्यो घडणुको घडल्यात. रातच्या वेळार शेतांतल्यान परतून येवपी शेकार आनी विद्यार्थी हे चड करून भियेल्यात. कांय गांवांत लोकांनी गस्ती घालपाक सुरवात केल्या. पूण हातूंत तांचोच जीव घाताक येवपाची शक्यताय चड उप्रासल्या.
रानां खातें अजूनय न्हिदेंत
ह्या गंभीर परिस्थितींत रानां विभागाची भुमिका सामकी निश्क्रीय आशिल्ल्याची टिका जायत आसा. घडणूक थळार न येवप, फक्त फोनार कागाळी नोंद करून आडनदर करप वा बिबट्याचें ठावठिकाण लागना अशें सांगून हात वयर काडप हेंच तांचें काम जालां. कांय गांवांतल्यान पांदरे लावपाची मागणी सेगीत जायत आसून लेगीत ताचे कडेन आडनदर जायत आसा हे खातीर गांवच्या लोकांचो रानां खात्या वेलो विस्वास गेला.
ह्या बिबट्यांच्या हल्ल्यांच्यो घडणुको अचकीत वाडिल्ल्यो आसल्यो तरी हाचे फाटल्यान कारणां खूब आसात. वाडटी रानांतली अतिक्रमणां, खणकाम, दोंगर उत्खनन आनी शारांची वाड हाका लागून रानवटी प्राण्यांचो सैमीक अधिवास सोंपत चल्ला. ह्या प्राण्यांक अन्न, उदक आनी निवाऱ्याचो उणाव निर्माण जायत आसा, आनी हे खातीर ते लोकवस्तींत येतात. ही समस्या फक्त पेडणें पुरती मर्यादीत ना. पूण थळाव्या पांवड्यार हाचे परिणाम चड खरतायेन जाणवूंक लागल्यात.
ह्या वाठारांतल्या लोकांनी खूबशे फावटी थळावे प्रतिनिधी, सरपंच आनी रानां खात्याच्या अधिकाऱ्यांक निवेदनां भेटयलीं. पूण ताचेर कसलीच कारवाय जाल्ली ना. गांवांत रातपाळयेक वचपी लोकांची संख्या वाडल्या. लोकांनी शेतांत वचप बंद केलां. विद्यार्थी, पालकां मदीं हुस्क्याचें वातावरण निर्माण जालां. हें फक्त बिबट्याचें न्हय जाल्यार अपेशी प्रशासनाचें संकश्ट जालां.
मजगतीं, पेडणें रानां खात्याचे हरीश महाले हांचे कडेन संपर्क सादलो तेन्ना तांणी म्हणलें, हालीं पेडणें म्हालांतल्या विवीध पंचायत वाठारांनी बिबट्यांचो वावर वाडला. हालींच अमेरे पोरस्कडें पंचायत वाठारांत बिबटो आयलो. ताचे पयलीं हरमल, मांद्रें, विर्नोडें, कोरगांव वाठारांतूय बिबटो दिशिल्ल्याच्यो कगाळी आसात. आमी रातचें पेट्रोलींग करतात. जर सेगीत थंय बिबटो आयल्यार त्या वाठारांत नागरिकांची मागणी लक्षांत घेवन पांदरो लावपाचें काम वरिश्ठांच्या मार्गदर्शना खाला हातांत घेतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
