भांगरभूंय | प्रतिनिधी
आमदार प्रवीण आर्लेकार हांणी अधिकाऱ्यांक धरले धारेर; चांदेलच्या उदका प्रकल्पाक भेट
भांगरभूंय । प्रतिनिधी
पेडणें: पेडणें मतदारसंघांत सध्या उदकाची खर समस्या सतायता. हाची दखल घेवन शुक्रारा पेडणें मतदारसंघाचे आमदार प्रवीण आर्लेकार हांणी चांदेल उदका प्रकल्पाक भेट दिली आनी थंयच्या अधिकाऱ्यांक उदकाचे खर समस्ये खातीर जाब विचारून धारेर धरले.
आपल्या मतदारसंघांत जावपी उदकाचे समस्ये खातीर आपूण ओगी बसचो ना. पेडणेंच्या लोकांक कशेच तरेन उदकाची समस्या निर्माण जावची न्हय हे खातीर ताकतिकेन उपाय येवजण करात. जर उदक मर्यादीत आसा जाल्यार तशी पूर्वसुचोवणी दियात तशेंच चड अतिरिक्त टँकरांची वेवस्था करून उदका पुरवण करात, अशी सुचोवणी आर्लेकार हांणी चांदेलच्या अधिकाऱ्यांक दिली.
ह्या वेळार पेडणें उदका विभागाचे अभियंते सोमा नायक, सहाय्यक अभियंते संदीप मोरजकार, चांदेल उदका प्रकल्पाचे अधिकारी बालाजी फडते, चांदेल हसापूरचे सरपंच तशेंच पेडणें भाजपा मंडळाचे अध्यक्ष तुळशीदास गांवस, कासरवर्णेचे सरपंच नवनाथ नायक, पंच बाळा शेटकार, आनंद गांवस, प्रकाश गांवस, रतन गांवस, सुधीर मळीक तशेंच हेर लोक हाजीर आशिल्ले.
पेडणें म्हालात जावपी उदका पुरवण प्रकल्पाची आमदार आर्लेकार हांणी पळोवणी केली. उदका पुरवण मर्यादीत जावपा फाटलीं कारणां तांणी अधिकाऱ्यांक विचारलीं. एप्रील, मे अजून येवपाचो आसा. मार्चांतूच इतली समस्या जाता जाल्यार एप्रील, मेंत उपाय येवदण कशे तरेन करतले, अशेंय तांणी अधिकाऱ्यांक विचारलें.
मोपा विमानतळ आनी आयुश हॉस्पिटल प्रकल्पा खातीर उदक घुंवडायिल्ल्यान ही व्हड समस्या निर्माण जाल्या. आपले खातीर आपले लोक आपल्याक म्हत्वाचे आसात. ते खातीर तांच्या उदकाची योग्य उपाय येवजण करात, नाजाल्यार आपूण ओगी बसचो ना, अशीय शिटकावणी आमदार आर्लेकार हांणी संबंदीत अधिकाऱ्यांक दिली.
पेडणें वीज पुरवण खंडीत जाता, त्या वेळार उदक चडना. हे संबंदांत वेगळें नियोजन कित्याक करूंक ना? पेडणें मतदारसंघांत उदका पुरवण करतना अधिकाऱ्यांक कसरत करची पडटा, हाची पुराय कल्पना आसून लेगीत पंप कार्यान्वीत करचे खातीर कसल्योच उपया येवजण्यो करूंक नात. वीज पुरवण खंडीत जातली हाची पूर्वकल्पना आनी पूर्व नियोजन करप गरजेचें आशिल्लें. तें जावंक नाशिल्ल्यान ह्यो समस्या आतां उप्रासतात. हे खातीर संबंदीत अधिकाऱ्यांन नियोजीत असो आराखडो तयार करून ते विशीं उपाय येवजण करची, असो निर्देश आमदार आर्लेकार हांणी दिलो.
ह्या वेळार आमदार आर्लेकार हांणी नियोजीत 15 एमएलडी उदका प्रकल्पा विशीं प्रस्न विचारून तो केन्ना पुराय जातलो आनी ते खातीर कसली उपाय येवजण केल्या, असो प्रस्न केलो. हाचेर जाप दितना रोखडोच हो प्रकल्प पुराय जातलो अशें अधिकाऱ्यांनी सांगलें. पूण आमदार आर्लेकार हांणी तांकां सांगलें, प्रकल्पाचो वावर पळयल्यार तो पुराय जावपाक आनीक पांच- स म्हयने तरी लागतले अशें आपल्याक दिसता. भौशीक बांदकाम मंत्री निलेश काब्राल तशेंच मुख्यमंत्री डॉ. प्रमोद सावंत हांकां पेडणेंचे उदकाच्या प्रस्ना कडेन गांभिर्यान पळोवचें आनी उदकाची समस्या मुखेलपणान सोडोवची, अशी आपूण विनवणी करतलों, अशें आमदार आर्लेकार हांणी सांगलें.
कंत्राटी कामगारांच्या वेतन वाडीचेर चर्चा
उदका विभागांत कामाक आशिल्ले कंत्राटी कामगार हांच्या वेतनाचोय प्रस्न आमदार प्रवीण आर्लेकार हांणी अधिकाऱ्यांक विचारलो. तांचें वेतन उणे आसा. तांकां तें वाडोवन दिवचे खातीर कसली उपाय येवजण केल्या हे विशीं तांणी अधिकाऱ्यां कडेन चर्चा केली. फाटलीं कितलीशींच वर्सां ते कर्मचारी कंत्राटी पद्दतीचेर काम करतात. सरकारान तांचो वेतनाचो प्रस्न सोडोवचो, अशीय मागणी आर्लेकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
