भांगरभूंय | प्रतिनिधी
आमदार आर्लेकार करतले मुख्यमंत्र्यां कडेन चर्चा
पेडणें: पेडणेंच्या बाजारांतल्यान वचपी प्रस्तावीत २५ मिटर एमडीआर रस्त्याक पेडणें बाजारांतले वेवसायीक तशेंच नागरिकांचो खर विरोध आसा. ह्या रस्त्याविशीं हांव मुख्यमंत्री डॉ. प्रमोद सावंत हांचे कडेन बाजारपेठ समिती, नागरीक तशेंच नगरसेवकांची जोड बसका घेवन तोडगो काडपाचो यत्न करतलों, अशें आस्वासन आमदार प्रवीण आर्लेकार हांणी दिलें. पेडणे बाजार समितीन आयोजीत केल्ल्या बसकेंत ते उलयताले.
ह्या वेळार नगराध्यक्ष मनोज हरमलकार, सगले नगरसेवक, आदले नगराध्यक्ष डॉ. वासुदेव देशप्रभू, बाजार समितीचे अध्यक्ष रसिक शेणवी देसाय आनी हेर हजर आशिल्ले.
२०२१ च्या प्रादेशीक आराखड्या प्रमाण हो २५ मिटर रस्ता पुराय गोंयांत जातलो. मात पेडणें बाजारांतल्यान तो गेल्यार हांगाचीं पोरणीं दुकानां, आस्थापनां तशेंच लोकांची घरांय वतलीं. आमकां २५ मिटर रस्तो नाका. सरकारान ह्या वाठारांतल्यान आठ ते णव मिटर रस्तो करचो. हाका लागून लोकांक सुशेग मेळटलो. २५ मिटर रस्तो केल्यार सगल्यांचीं घरां, देवळां मोडचीं पडटलीं. सरकारान हाचेर योग्य तोडगो काडपाक आपूण मुख्यमंत्र्यां कडेन उलयतलों अशें आमदार आर्लेकार हांणी सांगलें.
ह्या भागांत खुबशीं देवळां आसात. आमची संस्कृती, अस्मिताय हीं देंवळां जपतात. रस्तो रुंद केल्यार हीं सगलीं देवळां मोडचीं पडटलीं. हाका लागून ह्या रस्त्याक आशिल्लो नागरिकांचो विरोध लक्षांत घेवन तो आठ ते णव मिटरांचो करचो म्हूण आपूण मुख्यमंत्र्यां कडेन लोक, नगरसेवक हांची जोड बसका घेतले. हो २५ मिटर रस्तो एकवटान रद्द करुया. म्हजें ताका पुरायेन फाटबळ आसतलें अशें आमदार आर्लेकार हांणी हे बसके वेळार आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
