भांगरभूंय | प्रतिनिधी
पेडणें: पेडणें नगराध्यक्षपदार सत्ताविसावी नगराध्यक्ष म्हणून तृप्ती आनंद सावळ देसाय हांची विरोधाविणें निवड जाली. पेडणें पालिकेची मार्च वा एप्रील म्हयन्यांत वेंचणूक जातली. त्या उरिल्ल्या काळा खातीर नगराध्यक्ष म्हणून तृप्ती सावळ देसाय हांची निवड केल्या. नगराध्यक्ष विशाखा गडेकार हांणी अलिखीत करारा प्रमाण आपलो राजिनामो आठ दिसां आदीं सादर केल्लो. २१ तारखेर पेडणें पालिका मंडळाची विशेश बसका आयोजीत केली, नवे अधिकारी म्हणून पेडणें उपजिल्लोधिकारी शिवप्रसाद नायक हांणी काम पळयलें. तांणी तृप्ती सावळ देसाय हांची विरोधाविणें निवड जाहीर केली.
ह्या वेळार उपनगराध्यक्ष शिवराम तुकोजी, आदले नगराध्यक्ष तशेंच नगरसेविका विशाखा गडेकार, नगरसेविका उषा नागवेंकार, नगरसेविका अश्विनी अरविंद पालयेंकार, नगरसेवक माधव सीनाय देसाय, नगरसेवक सिद्धेश पेडणेंकार, नगरसेवक मनोज हरमलकार हाजीर आशिल्ले. जाल्यार नगरसेवक बाप्पा उर्फ विष्णू साळगांवकार आनी राखी कशालकार हाजीर रावूंक ना.
ह्या वेळार पेडणेंचे आमदार प्रवीण आर्लेकार हांणी नगराध्यक्षपदार तृप्ती सावळ देसाय हांची निवड जाले उपरांत तांकां फुलांचो तुरो भेटोवन परबीं भेटयलीं. तशेंच तांणी म्हणलें, आठूय नगरसेवकांनी अलिखित करारा प्रमाण नगरसेवकांक शब्द दिलो. तो तांणी नियमितपणान पाळ्ळो. ह्यान मुखारूय तांणी संघटीत रावन फुडले वेंचणुकेंतूय हेंच पालिका मंडळ वेंचून येवचें अशें म्हणीत परबीं भेटयलीं.
नवी नगराध्यक्ष तृप्ती सावळ देसाय हांणी, नगरसेवकांनी आपल्याचेर विस्वास दवरून आपल्याक संद दिली. तशेंच आपल्या प्रभागांतल्या नागरिकांनी आपल्याक नगरसेवक म्हणून वेंचून हाडलें. आपूण तया सगल्यांचेञ उपकारी. नगराध्यक्षपदार बसपाची ही संद आपल्याक सगल्यांच्या सहकार्यान मेळ्ळ्या. देड म्हयन्यांचो जरी काळ उरला तरी ह्या म्हयन्यांत जीं उदरगतीचीं कामां आसात, तीं आपूण आमदार प्रवीण आर्लेकार, सरकाराच्या सहकार्यांतल्यान करपाचो यत्न करतली, अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
