भांगरभूंय | प्रतिनिधी
शिवराम तुकोजी उपनगराध्यक्ष
पेडणें: पेडणें नगराध्यक्षपदार आश्विनी अरविंद पालयेंकार आनी उपनगराध्यक्षपदार शिवराम तुकोजी हांची विरोधाविणें निवड जाली.
फाटल्या पंदरा दिसां पयलीं नगराध्यक्ष मनोज हरमलकार आनी उपनगराध्यक्ष उषा रुद्रेश नागवेंकार हांणी तोंडी करारा प्रमाण आपापल्या पदाचो राजीनामो दिल्लो. हाका लागून हीं दोनूय पदां रितीं आशिल्लीं. बिरेस्तारा पेडणें पालिकेचे विशेश बसकेंत वेंचणूक घेतली. पालयेंकार आनी तुकोजी हांणी दोन दिसां आदीं अर्ज सादर केल्ले. एकेकूच अर्ज आयिल्ल्यान तांची आयज विरोधाविणें निवड जाहीर केली.
उपरांत आमदार प्रवीण आर्लेकार, हळदोणचे आमदार कार्लूस फेरेरा, मिशन फॉर लोकलाचे राजन कोरगांवकार हांणी खासा हाजीर रावन निवड जाल्ल्या नव्या नगराध्यक्ष आनी उपनगराध्यक्षांक परबीं भेटयलीं. तशेंच ह्या वेळार कोरगांव जिल्लो पंचायत वांगडी रंगनाथ कलशांवकार, चांदेल हंसापूरचे आदले सरपंच तुळशीदास गांवस, कोरगांवची पंच अनुराधा कोरगांवकार, आदली सरपंच स्वाती गवंडी, नरेश कोरगांवकार, मधुकर पालयेंकार, धारगळचे आदले सरपंच भूषण उर्फ प्रदीप नायक, उद्देजक रुद्रेश नागवेंकार, प्रकाश कांबळी, हरमलचे आदले सरपंच डॅनियल डिसोजा, बाबूश फर्नांडीस आनी हेर समर्थकांनी हाजीर रावन परबीं भेटयलीं.
नगराध्यक्ष, उपनगराध्यक्ष हांची निवड करपाचे बसकेक पेडणें उपजिल्लोधिकारी शिवप्रसाद नायक मुख्याधिकारी, नगरसेवक माधव सीनाय देसाय, नगरसेवक मनोज हरमलकार, नगरसेवक सिद्धेश पेडणेंकार नगरसेविका विशाखा गडेकार, नगरसेविका तृप्ती सावळ देसाय आनी हेर हाजीर आशिल्ले.
पेडणें उपजिल्लोधिकारी शिवप्रसाद नायक हांणी ही निवड जाहीर केली.
आश्विनी पालयेंकार हांणी सांगलें, नगरसेवकांनी आपल्याचेर विस्वास दवरून नगराध्यक्ष पद दिलें. तशेंच प्रभागांतल्या सगल्या मतदारांनी नगरसेविका म्हणून निवडून हाडली. ते खातीर सगल्यांचे उपकार मानतां. आमदार आनी सरकाराच्या सहकार्यांतल्यान उदरगतीच्या कामांक प्राधान्य दितले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
