भांगरभूंय | प्रतिनिधी
विशाखा गडेकार हांणी दिलो नगराध्यक्ष पदाचो राजीनामो
पेडणें: पेडणें नगरपालिकेंत संगीत खुर्चीचो खेळ चालूच आसा. हाका लागून उदरगतीकूय वेर वता. मात हे खुर्चेर वेंचून आयिल्ल्या दरेका नगरसेवकाक नगराध्यक्ष आनी उपनगराध्यक्ष पद मेळिल्ल्यान सगले नगरसेवक समाधानी आसात. मात तांतलीं विष्णू उर्फ बाप्पा साळगांवकार आनी राखी कशालकार ह्या दोगां नगरसेवकांक मात नगराध्यक्ष आनी उपनगराध्यक्ष पद मेळूंक ना.
देड म्हयन्याञ आनीं नगराध्यक्ष म्हणून विशाखा विश्राम गडेकार हांची निवड जाल्ली. अलिखीत करारा प्रमाण देड म्हयन्याचो कार्यकाळ सोंपल्या उपरांत तांणी आपल्या पदाचो राजीनामा दिलो. आतां फुडली नगराध्यक्ष म्हणून नगरसेविका तृप्ती आनंद सावळ देसाय येतली.
वट्ट १० नगरसेवक आशिल्ल्या पालिका मंडळात विष्णू उर्फ बाप्पा साळगांवकार आनी राखी कशालकार ह्या दोन नगरसेवकांक मात विरोधी बाकार बसपाची पाळी आयल्या. मात आठ उरिल्ले नगरसेवक नगराध्यक्ष, उपनगराध्यक्ष पद घेवन ते समाधानी आसात.
ह्यान पयलीं नगराध्यक्ष म्हणून उषा नागवेंकार, आश्विनी पालयेंकार, विशाखा गडेकार,सिद्धेश पेडणेंकार, माधव सीनाई देसाय, मनोज हरमलकार, शिवराम तुकोजी हांकां नगराध्यक्ष पदा वांगडा उपनगराध्यक्ष पदूय मेळ्ळें. मात राखी कशालकार आनी बाप्पा उर्फ विष्णू साळगांवकार हांकां तें मेळूंक ना.
आतां नगराध्यक्ष म्हणून तृप्ती सावळ देसाय हांणी निवड जातली. नगराध्यक्ष पदाचो विशाखा गडेकार हांणी राजीनामो दिले उपरांत फुडली नगराध्यक्ष म्हणून तृप्ती सावळ देसाय हांची विरोधा विणें निवड जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
