भांगरभूंय | प्रतिनिधी
पेडणें: पेडणें पालिकेच्या उपनगराध्यक्षपदाची वेंचणूक काल (शुक्रारा) सकाळीं पेडणें पालिका कचेरेंत जाली. उपनगराध्यक्षपदा खातीर उषा नागवेंकार हांचो एकूच अर्ज आयिल्ल्यान तांची बिनविरोध निवड जाल्ल्याचें वेंचणूक अधिकारी तशेंच पेडणें म्हाल उपजिल्होधिकारी शिवप्रसाद नायक हांणी जाहीर केलें.
उपनगराध्यक्ष विशाखा गडेकार हांणी उपनगराध्यक्षपदाचो राजिनामो दिले उपरांत हें पद रितें जाल्लें.
अलिखीत कबलाती प्रमाण उपनगराध्यक्ष विशाखा गडेकार हांणी आपल्या पदाचो राजिनामो दिल्लो. वट्ट धा नगरसेवक आशिल्ल्या पेडणें पलिकेची आदली नगराध्यक्ष आनी सद्याची नगरसेविका उषा रुद्रेश नागवेंकार हांची उपनगराध्यक्षपदार बिनविरोध निवड जाली.
ह्या वेळार नगराध्यक्ष मनोज हरमलकार, नगरसेविका विशाखा गडेकार, नगरसेविका उषा नागवेंकार, नगरसेविका अश्विनी पालयेंकार, नगरसेविका तृप्ती सावळ देसार, नगरसेवक सिद्धेश पेडणेंकार, नगरसेवक शिवराम तुकोजी हे सात नगरसेवक हाजीर आशिल्ले.
ह्या वेळार उषा नागवेंकार हांणी आपली प्रतिक्रिया दितना पालिका मंडळाचे तशेंच आमदार प्रवीण आर्लेकार हांणी आपल्याचेर विस्वास दवरून आपल्याक नगराध्यक्षपदार बिनविरोध निवड केल्ले खातीर सगल्यांचे उपकार मानले. आमदार प्रवीण आर्लेकार हांच्या मार्गदर्शना खाला पालिका मंडळ काम करता. हाचे मुखारूय तांच्या मार्गदर्शना खाला पेडणें पालिकेच्या विकासा खातीर काम करतली अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
