भांगरभूंय | प्रतिनिधी
पेडणें: पेडणें उजो पालोवपी दळाच्या जवानांनी आगरवाड्यार शेतांत जमनीक सपाट आशिल्ल्या बांयंत पडिल्ल्या दोगां रेड्यांक जीवदान दिलें.
दोन रेडे पडिल्ल्याचें हांगाचे थळावे नागरीक आनंद नायक हांकां दिसलें. तांणी पंच सचिन राऊत हांकां म्हायती दिले उपरांत तांणी पेडणें उजो पालोवपी दळा कडेन संपर्क केलो. उपरांत जवानांनी घडणुके सुवातेर धांव घेवन राजवाचे मजतीन रेड्यांक भायर काडले. हे रेडे आगरवाडो गांवांतले न्हय, हेर गांवांतले आशिल्ल्याचें तांणी सांगलें.
बुधवारा रातीं उसरां हे रेडे बांयत पडल्यात आसूंये. तांकां भायर काडपाक थळावे पंच सचिन राऊत, अँथनी फर्नांडीस हांचे सयत जायत्या जाणांनी मजत केली. पेडणें उजो पालोवपी दळाचे वांगडी अधिकारी सुनील देसाय हांचे वांगडा ड्रायव्हर माहिल मोरजकार, फायर फायटर आशीर्वाद गाड, तेजस आरोंदेकार, विराज किन्लेकार, श्रीनेश कोरखणकार हांणी मेहनत घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
