भांगरभूंय | प्रतिनिधी
पेडणें: कासारवर्णें, चांदेल-हंसापूर, इब्रामपूर, हळर्ण ह्या वाठारांतल्या शेतांनी गवे व्हडा प्रमाणांत दिसपाक लागल्यात. ते शेतांचें, बागायतींचें लुकसाण करतात. रान खात्यान ह्या गव्यांचेर आजूनय कांयच उपाय काडूंक ना. हाका लागून शेतकारांनी तिडक उक्तायल्या. हालींच पडिल्ल्या व्हड पावसांतूय शेतकारांचें लुकसाण जाल्लें. मात पेडणें म्हालांतल्या शेतकारांक ताची लुकसाण भरपाय चवथी वेळारूय मेळूंक ना. मात सरकारान वाळपय, सत्तरी, दिवचल ह्या वाठारांत लुकसाण भरपाय दिल्ल्याचो दावो पेडणेंचे शेतकार करतात.
कासारवर्णें, इब्रामपूर, हळर्ण, चांदेल हंसापूर ह्या वाठारांतले शेतकार शेतांनी विवीध पीक पिकयतात. हातूंत भाताच्या पिका सयत पालेभाजयो, हळसांदे, कुळीथ, ऊस, वायंगीं तशेंच हेर पिकांचो आसपाव आसा. कृषी खात्याच्या येवजण्यांचो लाव घेवन शेतकार लागवड करतात. मात फाटल्या धा- पंदरा वर्सां पसून ह्या वाठारांत रानवटी हतयां उपरांत आतां गवे वावुरपाक लागल्यात. हे गवे रातचे शेतांनी घुसतात आनी फांतोडेर दोंगर, रानांनी परतात. लुकसाण भरपाय वेळार मेळनाशिल्ल्यान जायते शेतकार शेतां कडेन आड नदर करपाक लागल्यात.
हळर्ण-चांदेल, हंसापूर, इब्रामपूर ह्या वाठारांनी हतयांचें कळप देंवून शेतांचें लुकसाण करताले. उपरांत सरकारान गंभीर दखल घेवन हतयांक मांगेली दोडामार्ग ह्या दाट रानांत व्हरून सोडले. ताचे उपरांत हतयांनी ह्या वाठारांत पांय दवरूंक ना. ताचे उपरांत ह्या वाठारांत गवे शेतांनी देंवून लुकसाण करपाक लागल्यात.
सध्या भात शेती जाले उपरांत शेतकारांनी मिरसांगो, कांदे, हळसांदे, भिकणां, ऊस, मको हांची शेती करपाक सुरवात केल्या. मात हे गवे शेतकारांच्या फाटल्यानूच लागल्यात. ताका लागून रान खात्यान कितेंय उपाय करचो अशी मागणी शेतकारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
