भांगरभूंय | प्रतिनिधी
पणजी : पेडणेंच्या नानेरवाडो वाठारांत एकेच राती तीन चोरयो जाल्यो. सोमारा रातीं अनवळखी चोरांनी तीन दुकानां फोडून लाखांचें सामान चोरून व्हेलें. हेच सोमारचे रातीक कडेन न्हयबाग वाठारांतल्या चार ट्रकांच्यो बॅटर्योय चोरांनी चोरून व्हेल्यो.
कांय दिसां पयलीं नानेरवाड्यार दिसाची रेणुका शिरोडकार हांच्या घरांत चोरी जाल्ली. चोरांनी कुलूप तोडून सुमार तीन लाखांचे मंगळसूत्र आनी ७० हजार रुपया चोरिल्ले. चोरये वेळार वयले माळयेर रावपी बिराडकाराक ताची कूड भायल्यान बंद करून भितरूच दवरिल्लें. हे घडणुके उपरांतूय सुरक्षेच्यो उपाय येवजण्यो जावंक नात, अशें थळाव्यांचें म्हणणें आसा.
हालीं ह्या वाठारांत बर्योच चोरयो जाल्ल्यान भंयाचें वातावरण पातळ्ळां. चोरी केल्ल्या वाठारांत सीसीटीव्ही नाशिल्ल्याचो चोरांनी फायदो घेतिल्ल्याचें मुखार आयलां.
सध्या हे चोरयेचो पेडणेंचे पुलीस निरीक्षक सचिन लोकरे हांच्या मार्गदर्शना तपास सुरू आसा. ह्या वाठारांतल्यो सीसीटीव्ही फुटेज आनी दुबावीत हालचालींची फाटपुरवण करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
