भांगरभूंय | प्रतिनिधी
आमदार प्रवीण आर्लेकारः वीज ट्रान्सफोर्मराचें उक्तावण
भांगरभूंय । प्रतिनिधी
पेडणें: पेडणें मतदारसंघांतली वीज समस्या पांवड्या पांवड्यान सोडोवपाचो आपूण यत्न करतां. भुंयगत वीज केबल घालून ही समस्या सोडयतले, अशें आमदार प्रवीण आर्लेकार हांणी सांगलें. गडेकार भाटले पेडण्यां 17 लाख रुपया खर्च करून उबारिल्ल्या वीज ट्रान्सफोर्मराचें उक्तावण केले उपरांत ते उलयताले.
ह्या वेळार पेडणेंचे नगराध्यक्ष सिद्धेश पेडणेंकार, उपनगराध्यक्ष आश्विनी अरविंद पालयेंकार ,नगरसेवक विष्णू उर्फ बाप्पा साळगांवकार, नगरसेवक माधव सिनाय देसाय, नगरसेवक शिवराम तुकोजी, नगरसेविका विशाखा गडेकार ,नगरसेविका राखी कशालकार, अभियंते वाटू सावंत, अरविंद पालयेकार, कंत्राटदार संतोष कोरखणकर हाजीर आशिल्ले.
पेडणें मतदारसंघांतल्या ज्या वाठारांनी अजून लेगीत वीज समस्या आसा, ती बेगिनूच सोडयतले. तशेंच पांवड्या पांवड्यान ज्यो मुख्य आनी भितरल्या रस्त्यांचेर लायटी ना, त्योवूय घालतले. पुराय मतदारसंघांत उजवाड फाकोवपाचो आपलो यत्न आसा. एकाद्या वेळार नवो ट्रान्सफोर्मर उबारतना जमनीची गरज लागता. रस्तो रूंद करपा वेळार जमनीची गरज आसता. लायटीचे खांबे घालपाक लेगीत जमीन जाय पडटा. अश्या वेळार लोकांनी आपली जमीन दिवन आदार करपाची गरज आसा, अशें आमदार आर्लेकार हांणी सांगले.
पेडणें पालिका वाठारांत भुंयगत वीज केबल घालचे खातीर आपूण बेगिनूच यत्न करतलों. सध्या मांद्रें मतदारसंघांत भुंयगत वीज केबल घालपाचें काम चल्लां, अशेंय आर्लेकार हांणी सांगलें. नगराध्यक्ष पेडणेंकार हांणी सांगलें, पालिका वाठाराचे उदरगती खातीर आमदार आर्लेकार हांणी 100 टक्के आदार दिवपाची गरज आसा. तांचेच मजतीन उदरगतीचीं कामां चल्ल्यांत. उदक, वीज, रस्ते ह्यो मुळाव्यो सुविधा दिवचे खातीर ते सरकार दरबारांत यत्न करतात. तांणी पालिका वाठारांत भुंयगत वीज केबल घालून फुडारांतली वीज समस्या पयस करची, अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
