भांगरभूंय | प्रतिनिधी
जीत आरोलकार: पालयां गुरू पौर्णिमा कार्यावळ दबाज्यान
हरमल: पेडणें म्हाल हो कलाकारांची खाण मानतात. पूण पालयें गांवांतले कलाकार आनी तांची संस्कृती खूब व्हड आसा. घरां कणकणीं कलाकार आशिल्ल्यान ह्या संस्कृतीचो सांबाळ करप गरजेचें आसा. मांद्रें मतदारसंघ पर्यायान पेडणें म्हालांतल्या कलाकारां खातीर रोखडेंच रवींद्र भवन प्रकल्पाची उबारणी गरजेची आसून सुसज्ज आनी मॉडेल स्वरुपांत उबारतले अशें मांद्रें मतदारसंघाचे आमदार जीत आरोलकार हांणी सांगलें.
पालयां श्रीवेताळ सभाघरांत आयोजीत केल्ल्या संगीत शिक्षक तुकाराम बिट्ये गोवेकार (शिवोली) आनी शिश्य परिवार आयोजीत गुरू पौर्णिमा कार्यावळीच्या उक्तावण सुवाळ्यांत ते उलयताले.
रवींद्र भवन पेडणें म्हालाची गरज वळखून मुख्यमंत्री डॉ. प्रमोद सावंत हांणी मंजुरी दिल्या आनी अदमाशेक 50 हजार चौखण मिटर सुवातेंत तुयां भोवउद्देशी आनी अद्ययावत अशें रवींद्र भवन प्रकल्पाचे सोपस्कार आमदार म्हूण वेंचून आयले उपरांत सुरू केले आनी ताका येस मेळ्ळें. हे खातीर म्हालांतल्या कलाकारांची समितीची निवड करतले अशें जीत आरोलकार हांणी सांगलें.
कलाकारांनी कलेंत पारंगत जावपा खातीर चित्त, मन आनी अंतर्मन हाचो मिलाफ करप गरजेचें आसा. नशीब बरोवपाचें धाडस कलाकारान करूंक जाय आनी तातूंत येसस्वी जायत जाल्यार व्हड कलाकार जावंक शकता. आपणें खर कश्ट घेतले उपरांत व्हॉलिबॉल खेळून गोंयच्या पंगडाचो मुखेली जालों. म्हजी फावरान निवड शक्य आशिल्ली. पूण ती भीक घेनासतना खर कश्ट करून गोंय राज्या खातीर खेळ्ळों. ताका लागून दरेक साधक कलाकारांनी कश्ट आनी समर्पण भावनेन कार्य करपाचें आवाहन जीत आरोलकार हांणी केलें.
दरेक शिश्याक गुरू, रियाज आनी नशिबाची साथ गरजेची आसा. तुकाराम गोवेकार हे उत्कृश्ट गुरू आसून तांणी दिल्लें ज्ञान आत्मसात करून रियाज करप गरजेचें आसा. दरेक मळार नशीब हें लागताच. सद्या यू ट्यूबाचेर सगलें कितें उपलब्ध आसा. पूण गुरून शिकयिल्लें ज्ञान रोखडेंच समजता हो फरक आसा अशें जीत आरोलकार हांणी म्हणलें.
ह्या वेळार सरपंच स्नेहा गवंडी, पंच वांगडी सागर तिळवे हांचींय उलोवपां जालीं.
माचयेर श्रीवेताळ भुमिका देवस्थानाचे अध्यक्ष एकनाथ परब, पंच वांगडी शिवा तिळवे, गुरू तुकाराम बिट्ये गोवेकार हाजीर आशिल्ले.
आदित्य तुमाराम तारी हांणी जीत आरोलकार हांकां फुलांतुरो भेटोवन येवकार दिलो. गोवेकार शिश्यांनी माचये वेल्या मानेस्तांक फुलांतुरो भेटोवन येवकार दिलो. सुत्रसंचालन परेश नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
